ANAA sa Committee on Transportation sa House of Representatives ang House Bill 8959 nga nagtinguha nga mahimong legal ang pagpamasahero sa mga habalhabal sa tibuok Pilipinas.
Kini ang gibutyag ni Kongresista Raul Del Mar sa Cebu City north district human iyang subli nga giduso ang balaudnon sanglit nagkuwang sila sa panahon niadtong 17th Congress.
Ang HB 8959 kun “Act Allowing and Regulating the Use of Motorcycles as Public Utility Vehicles, Amending for this Purpose Republic Act 4136, otherwise known as the Land Transportation and Traffic Code, and for other purposes,” napasar na unta sa ikatulong pagbasa apan nagkuwang na sila sa panahon sanglit ni-adjourn na ang Kongreso.
Si Del mar nagkanayon nga mobalik sa uno ang proseso sa HB nga iyang gi-subli nga giduso, apan siya nanghinaot nga mahatagan kini og prayoridad.
“ We expect that it will be given priority because it was already passed and approved in the third reading of the 17th Congress,” padayag sa kongresista. (PAC)