NAALARMA na ang katawhan sa Davao del Sur human niabot og onse ka oras ang nahitabong brown-out niadtong adlaw'ng Biyernes.

Nasinati sa mga lungsod sa Bansalan, Matanao, Magsaysay, ug pipila ka bahin sa siyudad sa Digos ug Sta. Cruz, ang pagkapawong sa kuryente gikan ala una ang takna sa hapon hangtud alas 12:00 sa tungang gabii. Kini sukwahi sa gipagulang abiso sa Davao del Sur Electric Cooperative (Dasureco).

Sa pagsubay sa Sun. Star Superbalita, managlahing pahayag ang gipagula sa National Grid Corporation of the Philippines (NGCP) ug Dasureco, sanglit nagtinukluray kini kon kinsa ang nagbuot sa kataas sa oras sa nahitabong brown-out.

Si Engineer Edcil Lureca sa Engineering Department sa Dasureco, nikanayon nga wa silay mahimo sanglit mismong ang NGCP ang nagbuot sa kataas sa oras nga mawala ang enerhiya.

Apan matud sa NGCP nga ang Dasureco ang nag-kontrol sa sistema ug igo lang sila sa pagpalong niini.

Nasuta sab nga unang nihangyo ang Dasureco nga ibalik unta bisan ang linya sa Bansalan sanglit katapusang gabii sa lamay sa inahan ni Dasureco Vice President ug Board of Director Wilfredo Granada, kinsa nasunog dungan sa ilang panimalay atol sa brown-out gumikan sa gidagkutang kandila ning bag-o lang.

Apan wa gyud nitugot ang NGCP tungod kay gikinahanglan matud pa ang pagpawong sa taas nga oras.

Dinhi, gibulgar sa Dasureco nga mamahimo ra untang ibalik sa NGCP ang kuryente tungod kay aduna man silay 20 porsiyentong pundo.

"Naa gyuy power ang NGCP nga ibalik ang kuryente kay if mo-excess ta og pila ka megawatts, 20 percent ang reserved nila," ni Lureca.

"Wala gyud na sa amo ang decision making. Pareha ganina, kung dili sila gusto sa Bansalan na linya ang i-out, naa man sila laing option. Wala man nay problema sa amoa kung asa na linya ang i-out basta naabot lang ang requirement. Mas nindot pa gani kung Malita or Digos na linya kay dili malapas sa required," matud ni Julius Pimentel kinsa operator sa NGCP-Matanao.

Apan matud sa Dasureco nga wala sa ilang eskedyul ang mao nga mga lugar.

Ang gipagulang eskedyul sa Dasureco sa ilang Facebook account, usa ka social networking site sa internet nikanayon nga gikan alas 6 hangtud alas 11 unta sa gabii ang brown-out apan wa damha nga mga ala una pa lang sa hapon nawala na ang kuryente mao nga gikasuko kini sa katawhan.

"In truth Sir, naa pa may excess kay 700 MW ra sa Mindanao Grid ang kulang pero NGCP declared 750 MW. Naa pud silay 20 percent na reserved. Pwede gud unta mohatag sila maskin 1 megawatt just to cater some parts in Bansalan. We already requested and informed them about the situation in Bansalan, sadly they refused to grant it," matud sa Dasureco.

Gumikan niini, nilutaw karon nga daw nagdula-dula ang power supplier ug power distributor sa nahitabong kakuwang sa kuryente dinhi sa Mindanao sanglit daw gipasobrahan pa niini ang oras sa pagpawong sa kuryente.

Gibarugan sa Dasureco nga igo lang sila sa paghimo og eskedyul sa brown-out ug ang NGCP nitataw nga igo lang sab sila sa pagpawong sa enerhiya. (Orlando B. Dinoy)