APEKTADO ang Sugbo niining trough o extension sa Tropical Depression Liwayway ug mao kini ang hinungdan nga grabe ka kusog ang uwan ug magpabilin ang ingon niini nga panahon hangtod sa Martes.
Mao kini ang gibutyag sa Pagasa dihang hingpit nang nahimo nga bagyo ang low pressure area (LPA) sa Hinatuan, Surigao del Sur.
Sa unang storm weather bulleting sa Philippine Atmospheric, Geophysical and Astronomical Services Administration (Pagasa), nasigpatan ang maong bagyo alas 10 sa buntag, Dominggo, Septiyembre 1, 2019 sa 405 kilometros sidlakan amihanang-silangan sa Hinatuan, Surigao del Sur o 510 kilometros sa sidlakan sa Maasin City, Southern Leyte.
Gadala ang maong bagyo og hangin nga 45 kilometros ang takna ug pag-unos nga 55 kilometros ang takna.
Base sa forecast sa Pagasa, dili ra hinuon kini mo-landfall.
Gibutyag usab ni Pagasa Visayas officer-in-charge Engineer Al Quiblat nga dili ra kini makapaubos og signal warning sa Central Visayas o sa Sugbo.
Sukad alas 8 sa buntag hangtod alas 4 sa hapon sa adlawng Dominggo, natala na ang 15 millimeters sa uwan o susama kini og 75,000 ka drum sa tubig nga gibubo sa Sugbo, base na usab sa natala sa Pagasa Mactan. (Superbalita Cebu)