DUHA ka mga puloy-anan ang gilamoy sa kalayo human miulbo ang sunog niadtong Lunes mga alas 2:00 sa hapon sa Pimentel Road, Barangay Lapasan ning siyudad sa Cagayan de Oro.
Sa inisyal nga report sa Bureau of Fire Protection (BFP) ubos ni City Fire Marshal Shirley Teleron nasta nga ang puloy-anan gipanag-iyahan sa duha ka pamilyang Pimentel nga mao sila si Sherlita ug Roldan Pimentel.
Ang mga residente sa dapit nakamatikod lamang sa kusog nga aso gikan sa kusina ug taud-taud nibuga na og kusog nga kalayo.
Walay kabtangan nga nasalbar sa pamilya dihang napalong ang kalayo mga 50 minutos ang nilabay gikan sa pagkapalong.
Gibana-banang moabot ngadto sa P200 mil ang damyos sa sunog ug giimbestigahan pa ang hinungdan sa pag-ulbo sa kalayo labina dili madeterminar sa mga biktima kung asa nga parte sa kusina naggikan.
Gireklamo usab sa pamilyang’ nasunogan ang kalangan sa pagresponde sa BFP tungod kay posibleng kung paspas lamang unta kining nakareponde partially damaged lamang unta ang masunog.
Apan gipasabot sa kampo sa BFP nga labihan kahout ang dagan sa trapiko hinungdan sa pagkalangan. (SVB)