BILIB kita sa atong presidente tungod kay iya gayod nga gibungat ang iyang dakong tuyo niining iyang ikalima nga pagbisita sa China ang pagbawi sa West Philippines Sea, nga gi-angkon sa maong nasud.
Apan pakyas kita, bisan pa sa iyang pagpahinumdon nga midaug kita sa kaso kontra China sa United Nation Convention Law of the Sea (UNCLOS) sa desisyon sa arbitral tribunal nga ang maong dapit iya sa Pilipinas.
Usa lang ka simpol ug bugnaw nga tubag sa presidente sa China nga si Xi Jim Ping nga dili nila i-respito ang desisyon sa arbitral tribunal ug magpabilin sa ilang gobyerno nga ila gyud ang maong dapit ug wa na’y makabawi pa niini.
Nagtanyag og unom ka mga kondisyon ang China alang sa pagtabang sa Pilipinas, pagpalig-on sa atong relasyon pinaagi sa pagpa-improve sa atong edukasyon, sa atong Science and Technology, pagtabang para dako og kita ang atong Bureau of Customs (BoC), mga dagkong infrastructure project sama sa mga rail ways, ug ang katapusan ablihan na free water navigation nga maoy gikasuko sa mga nasud sa Asya, labi na sa America.
Kining kondisyon nga gibungat ni Xi Jim Ping, wala pa kita'y usa ka pulong nga nabati gikan sa atong presidente kung unsay iyang desisyon mahitungod niini.
Mitan-aw usa siya sa dula sa FIBA Pilipinas kontra Italia nga sakto gyud siya sa iyang gitagna nga pildihon ang atong team tungod kay gilat-an ug layo kaayo nga score ang Pilipinas sa Italy.
Karong adlawa, Lunes moabot ang atong presidente sa iyang lima ka adlaw nga pagbisita sa China, unsa kaha’y iyang ikasulti, kalamposan o kapakyasan?
Kung kapakyasan man, dawaton nalang gyod ka ha nato kining ikaduhang higayon nga mawad-an na usab og teritoryo ang Pilipinas sama sa Sabah? Duha ka presidente sa Pilipinas ang nag-claim sa Sabah, si kanhi Presidente Diosdado Macapagal ug kanhi presidente Ferdinand Marcos, apan wala kita’y nahimo.
Kung atong pugson ang pagbawi, segurado nga magka-giyera gyud kita, karon ang pangutana, andam ba kita nga makiggubat? Seguro naman, sobra sa katunga sa mga katawhang Pilipino ang tubag, dili.
Ato nalang dawaton nga dili na nato mabawi ang West Philippine Sea kung giyera man lang ang sangputanan. Kining tanan sala sa mga nanglabay'ng presidente nga wala angklahi og mga armadong Philipine Navy ang maong dapit hangtud nga nadiskubri nalang sa mga langyaw’ng nasud nga puno sa mga bahandi ang atong teritoryo.