LAING hugna na sab sa mga talented nga indibidwal sa Davao del Sur ug kasikbit dapit ang gilaumang madiskubre ug mas mabaid pa ang abilidad.
Kini human mobiyahe padung sa lugar ang ikaduhang leg sa MinPop Songwriting Bootcamp sa Davao del Sur.
Himuon kini sa Septyembre 8, ning tuig sa Matanao SB Session Hall, gikan 9AM ngadto 5PM.
Sa mga interesadong moapil, subay sa Facebook post sa MinPop gidasig kamo nga makigkoordinar sa LGU Matanao sa numerong 0910-970-0108.
Dugang pa nga may gibuksan nga 10 ka slots alang ngadto sa buot moapil nga gawas sa lugar.
Agosto ning tuig, naselyuhan ang panag-partner sa Local Government of Matanao, pinaagi ni Municipal Mayor Hon. Vincent Famor Fernandez ug MinPop Festival Director Jeremy Sarmiento labot sa pagpahigayon sa aktibidad sa Matanao.
Nasayran nga ang unang leg sa MinPop gihimo sa Davao City Hunyo ning tuig.
Mga partisipante midagsa sa Muzic's Kool aron makat-on og maayo labot songwriting, diin mga hawud ug maayo sa natad sa pagsuwat sa kanta ang nagsilbing speakers.