DAVAO DEL SUR -- Gi-anunsyo na sa Philippine Charity Sweepstakes Office (PCSO) nga subling mibalik na ang operasyon sa mga outlet sa Small Town Lottery (STL) sukad kahagapong adlawa, Dominggo, Septembre 1.
Apan, mga teller sa gatusan ka mga outlet sa lalawigan ang naghinam-hinam pa kung kanus-a sila makasugod sa operasyon.
Mihatag na og pagtugot ang PCSO nga mahibalik sa normal ang operasyon sa STL sa 39 ka mga dapit sa nasud.
Apil ang probinsya sa Davao del Norte ug Davao del Sur nga nahatagan og pagtugot sa PCSO mao nga gikalipay kini di lang sa mga tellers kun di apil ang mga tayador nga nanimpad nga makadaog sa duwa sa numero.
Apan, sumala sa 25-anyos nga si Mary Jean, taga Matanao, Davao del Sur, nga nalipay kayo siya kung makabalik na sab sila trabaho tungod kay dinhi niya ginakuha ang balon sa iyang tulo ka mga anak nga nagtungha sa elementarya.
Sa giingong pag-abri sa STL kagahapon, nagpabiling sirado ang mga outlet sa probinsya sa DavSur.
Ang tayador nga si Fermin Alejo, 34, sa siyudad sa Digos, nalipay sab sa maong balita kay alang niya adunay mga higayong modaog sab siya og kaduha sa usa ka semana.
Ang PCSO mihatag og otoridad sa 32 ka mga operators sa Authorized Agent Corporations (AACs), human napasa niini ang mga gipangayong rekisitos sama sa pagbayad og cash bond sud sa tulo ka bulang share sa PCSO nga gitawag og Guaranteed Minimum Monthly Retail Receipts (GMMRR).