DIGOS CITY -- Hingpit na nga gipatuman sa nasyonal nga kagamhanan ang ‘Nationwide Smoking Ban’ ilabi pa sa mga publikong sakyanan ug lugar apan sumala sa ubang pasahero sa dakbayan nga daghan gihapon ang misupak niini.
Usa ka Ginang ang nagpaabot sa iyang reklamo sa Sun.Star Superbalita human matod niya tulo ka higayon na siyang nakasakay og trisikel diin nagtangag pa og sigarilyo ang drayber.
Uwahing misakay ang 52-anyos nga si Conchita, padung sa merkado publiko niadtong Sabado sa hapon samtang gabunok ang kusog nga uwan, diin gibutyag niini nga aduna gihapon mga badlungong drayber ang wa motuman sa maong balaod sanglit wa na kini nabantayan sa lokal nga gobyerno.
Gipamatud-an sab kini sa Senior High School nga si Jessa Mae, human gitataw niini nga manigarilyo ang pipila ka mga drayber sa dakbayan ilabi pa kun mga estudyante ang ilang pasahero kay lisod silang mabadlong.
Kahibaloang gilagdaan ni Presidente Rodrigo Duterte ang Executive Order No. 26 kun ‘Nationwide Smoking Ban’ sa mga publikong dapit sa nasud niadtong Hulyo 2017.
Ubos sa maong balaod gikinahanglang ipatuman ang Clean Air Act of 1999 ug Tobacco Regulation Act of 2003.
Gawas sa nasyonal nga balaod aduna sab lokal nga ordinansa ang dakbayan diin hugot nga gidili ang panigarilyo sa mga publikong dapit apil sa mga publikong sakyanan.
Una na kining gipatuman sa mga otoridad kaniadto apan sa kasamtangan namatikdan sa ubang nagpakabanang molupyo nga daw nakalimtan.
Sa balaod nga gilagdaan sa presidente, gitakda ang multa nga P10,000 sa bayolasyon sa Seksyon 32 sa Tobacco Regulation Act Enforcement.
Apan, gawas sa panigarilyo sa publikong dapit, gibutyag sab sa mga reklamante nga aduna gihapoy mga tindahan nga mamaligya og sigarilyo ug ilimnon sa mga batang menor de edad nga ginasugo sa ilang mga ginikanan.