DILI mominos 20 minutos lang ug matapos na dayon ang pagproseso sa paglukat og passport sa Department of Foreign Affairs (DFA) nga gipasayon gumikan sa programang Passport on Wheels nga giandam sa kagamganan sa probinsya sa Misamis Oriental sa pagpanguna ni Governor Bambi Emano.
Basta og kumpleto lamang ang rekisitos lakip bayad dili na gyod langan ang paglukat sa passport gumikan kay mismong taga DFA sa kaulohan mao nay nag-anhi niadtong Agusto 27 ngadto 29 ning tuig aron iproseso ang renewal o paglukat og passpot sa Misamisnon ug Kagayanon.
Nagpadangat sa iyang pasalamat si Emano ngadto sa tanan nga nahimong kabahin sa kalamposan sa gipahigayong tulo ka adlaw nga Passport on Wheels program.
Espesyal sab kining nagpasalamat ngadto kang kanhi Department of Foreign Affairs Secretary ug karon House Speaker Alan Peter Cayetano ug pwersa sa DFA gikan sa kaulogan nga nahatagan sa katumanan ang hangyo sa pangagamhanang lokal sa Misamis Oriental nga magpahigayon sa nasangpit nga programa dinhi sa lalawigan.
Dugang niini nga nahimo lamang tulay ang kapitolyo aron nga mas mogaan ug mosayon ang paglukat og passport sa Misamisnon ug Kagay-anon, hilabina niadtong walay panahon nga maglinya sa DFA ug maghulat sa ilang pasaporte samtang naglakag sila sa schedule sa ilang biyahe pa-abroad.
Nasayrang dul-an 1,000 ang naka-proseso sa ilang aplikasyon sa DFA sulod sa tulo ka adlaw nga kalihukan.