NAENGKWENTRO sa 2nd Provincial Mobile Force Company ubos sa Misamis Occidental Police Provincial Office ug 10IB Philippine Army ang mga armadong grupo nga gitouhang sakop sa Guerilla Front Sendong atol sa checkpoint operation niadtong Agusto 25 mga alas 6:10 sa buntag nga gipahigayon sa Barangay Bagacay ug Cogon, Ozamiz City, Misamis Occidental.
Ang kasundalohan nagpahigayon niadtong tungora og checkpoint dihang ubay-ubay ka mga armadong grupo sakay sa lima ka mga motorsiklo ang mikalit og rakrak kanila hinungdan sa pagbinayloay og bala.
Dinhi nasikop ang tulo ka armado ug ilang mga kauban nagpalayo ug misibat paingon sa Barangay Cogon apan laing upat na usab ang nadakpan ug napatay atol sa operasyon.
Ang pito ka armado giilang sila si Rowen M. Lozano, 36, taga Brgy Medalyo, Sapang Dalaga, Misamis Occidental; Ricky I. Mag-Abo, 23, sa Purok Santo Tomas Brgy Mutia, Zamboanga del Norte; Charny B. Sumibay, 28, sa Brgy Dawa, Josefina Zamboanga del Sur; Johny T Bergado, 21, taga Purok 1, Brgy Mutia, Zamboanga del Norte; Wilfredo G. Pepito, 25, sa Brgy Santo Niño, Butuan City; Noel R. Rodrigo, 26, taga Purok 2, Brgy Guimad, Ozamis City, Emiliano G. Abadan Jr, 34, taga Maranding, Lala Lanao del Norte ug Alyas NASI kinsa maoy napatay sa operasyon.
Ang tropa nakarekober og M16 rifle, upat ka 45 caliber pistol, magazines, ammunition, pito ka fragmentation grenade, improvised explosive-device component, cash, ug ilang mga motorsiklo.
Samaran sab ang duha ka sundalo atol sa insidente nga giilang sila si Sgt. Julian Ysik ug Sgt. Jade Lomar C. Antiola.
Gidala na sa 10th IB, Philippine Army alang sa tactical interrogation ang mga dinakpan.