GIPAKABALIWALA nila ni Matthew Justine Hermosa ug Moira Frances Erediano ang hudlat sa ilang nga kaatbang, ug yano ra nilang gilangkat ang gold medal sa duathlon event sa 2019 Batang Pinoy National Championships didto sa Puerto Princesa, Palawan.
Sa makausa pa, gigamit ni Hermosa ang iyang kalantip aron dominahon ang boys’ 13-15 duathlon event niadtong Sabado aron hipuson ang iyang ikaduhang gold medal sa Under-15 multi-sporting nga gipasiugda sa Philippine Sports Commission.
Lumad nga taga Talisay City ug sakop sa Talisay Luigi Triathlon Group (TLTG-Go For Gold) nakalabang sa finish line sa nga maoy oras nga 33 minutos ug 22 seconds nga igo na kaayong nagmontar kaniya balik sa ibabaw nga puwesto human sa iyang pagdominar uisab sa aquathlon event sa niaging adlaw.
Nagsunod kaniya si Eryk John Omandam sa Davao del Norte ug Earol Belonguil sa Talisay City nga pulos mioras og 34:14.
Si Erediano, sa iyang bahin, mioras og 36:32 sa iyang pagdaog sa girls’ divison. Limpiyong dominasyon ang gihimo sa Talisay City human nga si Jeanna Cañeta ug Marielle Estreba maoy nagsunod ni Erediano sa oras nga 38:28 ug 38:35, matag usa. (RSC, JBM)