Killer, mga tulisan nasikop sa buy-bust

USA ka ex-convict sa kasong murder ug laing tulo ka mga lalake nga giila sa kapulisan nga tulisan, nasikop sa siyudad sa Talisay.

Nahitabo ang operasyon sa Sitio Romahan, Barangay Dumlog, Talisay, alas 7:30, Biyernes sa gabii, Agusto 30.

Nakuhaan ang grupo og gidiling drugas nga mobalor tanan og P104 mil.

Nasikop sa buy-bust si Jesryl Antig, 26, ang subject sa operasyon ug giila nga high value target sa Talisay Police Station.

Lakip sa nasikop sila si Jason Largo, 24; Aljun Baculao, 29; ug Erwin Jalandoni, 27.

Si Antig ang niangkon nga siya ug ang maguwang ni Jason Largo, nga si Jessie Largo, ang napriso na pipila ka tuig ang nilabay, tungod sa kaso nga pagtulis ug pagpatay sa usa ka nursing student sa Victoria Village, Barangay Tabunok.

Giangkon ni Antig nga mga menor de edad pa sila niadtong higayuna, hinungdan nga nakakuha ra usab sila og release order.

Si Jessie ang napatay niadtong Oktubre 2017 human kini nakigpinusilay sa mga pulis sa dihang sikupon na unta tungod sa kasong pagpatay sa anak sa usa ka kanhi journalist sa Sugbo.

Si Police Captain Nazarino Emia, deputy chief sa Talisay City Police Station, nibutyag nga si Antig ug si Jason Largo ang anaa na sa ilang drug watchlist.

Samtang, nakadawat usab sila og mga report kalabot sa pagpamaligya niini og ginadiling drugas sa maong barangay.

Human ang pipila ka adlaw nga surveillance, gihimo niadtong Biyernes sa gabii ang operasyon ug nasikop ang upat ka mga suspek.

Nasakmit gikan nila ang mga pinakete sa gituohan nga shabu.

Dugang ni Emia nga ang grupo usab nila ni Largo mao ang gitudlo nga responsable sa pipila ka tulis ug pagpangawat sa Talisay.

Dugang sa kapulisan, ilang gisubay karon ang uban pa nga mga kauban niini sa pagpadayon og pagkaylap sa gidiling drugas sa dapit. (FMD)