DILI pa hingpit nga makabalik sa operation ang mga Small Town Lottery (STL) sa mga siyudad sa Sugbo ug Lapu-Lapu bisan og gilibkas na ni Presidente Rodrigo Duterte ang suspensyon sa STL.
Kini tungod sa padayong wala mabayri nga utang sa mga operator.
Matod ni Police Brigadier General Debold Sinas, direktor sa Police Regional Office (PRO) 7, nga ang gitugotan lang una karon sa Philippine Charity Sweepstakes Office (PCSO) nga makabalik sa ilang operation ang mga STL sa probinsya sa Sugbo, Siquijor, Negros Oriental, Bohol ug siyudad sa Mandaue.
Tungod niini, gipakusgan karon sa kapulisan ang ilang operation batok ilegal nga sugal sa mga siyudad sa Sugbo ug Lapu-Lapu tungod sa naghitak nga illegal swertres.
“Kay ang naa dira sa Cebu ug laing lugar wala pa na sila makabayad. Wala pa na sila maka-comply. So, if you’re talking about Cebu City and Lapu-Lapu City STL, wala na.” matod ni Sinas.
Sa probinsya sa Sugbo, gitugotan usab nga maka-operate ang Peryahan ng Bayan.
Kon adunay makit-an ang publiko nga nibalik sa pag-abli nga stalls sa STL, matod sa heneral nga illegal kini ug angayan nga dakpon.
Kapin sa usa ka libo ka mga STL sa siyudad sa Sugbo ang gipasirad-an sa PCSO niadtong Hulyo 26.
“Kung mag-operate na illegal na, dakop gyud na. And we are informing the people na katong ga-operate sa Cebu City has no clearance na sa taas,” dugang ni Sinas.
Iya usab nga giklaro nga dili PNP ang mohatag sa go signal sa pagpabalik pagpa-operate sa mga STL sa mga siyudad sa Sugbo ug Lapu-Lapu. (AYB)