BUGTONG ang Department of Transportation (DoTr) ug Department of Finance (DOF) lang ang makatubag nga dunay awtoridad sa mga pangutana ni Kongresista Raul del Mar kabahin sa mga kausaban sa Cebu Bus Rapid (BRT) project.
Matod sa kongresista sa amihanang distrito sa siyudad sa Sugbo, matubag kini sa maong mga ahensiya sa hearing sa House Committee on Transportation.
Giklaro ni del Mar wa siya mangutana ni Presidential Assistant for the Visayas Michael Dino labot sa kausaban nga gihimo sa pagpatuman sa BRT project tungod kay gusto niya ang DoTr ug DOF ang motubag niini.
Si Dino unang niingon nga dili pagpamubo sa rota ang himuon sa proyekto kondili phasing lang sa trabaho.
Apan alang ni del Mar ang pagpamubo sa rota ug phasing kay duha ka managlahi nga mga butang.
“Shortening the route is a major change even if made in the guise of phasing. Which Dino practically admitted,” sulti sa kongresista.
Siya nagkanayon bisan ang gamay nga batang lalake makaingon nga ang pag-usab sa starting point gikan sa Bulacao ngadto na sa South Road Properties kay shortening ug dili phasing. Ug ang pag-usab sa end point gikan sa Talamban ngadto na sa IT Park kay klaro usab nga shortening.
Sa iyang privileged speech niadtong Martes, Agusto 27, si del Mar namahayag ang mga kausaban sa giaprobahan na nga mga rota maghikaw sa liboan ka mga sumasakay sa orihinal nga gipili nga mga lugar nga labing nanginahanglan og mass transportation.
Siya nidugang nga ang bisan unsa nga kausaban nga himuon sa plano sa BRT kinahanglan og pagtugot gikan sa Investment Coordination Committee-National Economic and Development Authority (ICC-Neda) Board.
Sigon niini bisan ang mga kausaban sa loan agreement kinahanglan dunay pagtugot gikan sa World Bank International Bank for Reconstruction and Development (IBRD), Clean Technology Fund ug Agence Francaise de Developpement.
Pamulong ni Del Mar dili makatubag si Dino sa mga pangutana labot sa BRT tungod kay dili kini ang opisyal nga gitudlo isip tigpamaba sa DOTr sa maong hisgutanan.
“I appreciate Dino’s making himself available to personally explain to me his side, and I shall in the future seek it if necessary. But it is clear that we gave different positions and the future House Committee on Transportation hearing will clarify the issue and who is right,” dugang ni del Mar. (PR)