DUHA ka mga pagdahili sa yuta ang natala sa Barangay Tisa kagahapon, Dominggo, Septiyembre 1, atol sa pagbunok sa uwan dala na usab sa trough o extension sa Bagyong Liwayway.
Tungod sa grabeng uwan, pito ka mga dapit sa maong barangay ang natala ang grabeng baha diin moabot na kini sa liog.
Hinuon, walay natala nga angol sa landslide ug baha.
Sa Hidden Valley, Barangay Tisa, walo ka mga motor ang nalubong human nidahili ang riprap sa Deca Homes sa maong dapit.
Matod ni Gwendyl Ciriaco, pangu sa Tisa Fire Brigade, nga alas 3 sa hapon sa Dominggo nahitabo ang pagdahili sa riprap.
Walay panimalay ang naigo, apan ang mga motor nga nag-park duol sa dapit ang nangalubong.
Girespondehan kini sa Quick Response Team sa Cebu City apan sa pagkutlo ning balita wala pa mohatag og komento ang tagdumala sa Deca Homes.
Gipabakwit usab ang usa ka pamilya sa Sitio Mahayahay sa susamang barangay human nidahili ang luyo nga bahin niini sa ilang panimalay.
Si Ciriaco nibutyag nga pito ka mga dapit sa ilang barangay ang nakasinati og pagbaha diin naglakip kini sa Sitio Tahna, Hapi-Hapi, Purok Sambag, Emerald Street, Lutaw-Lutaw, Lower Manol, ug Tambisan.
Wala ra magdugay ang baha apan nakamugna kini og daghang basura.
Samtang, apektado ang Sugbo niining trough o extension sa Bagyong Liwayway ug mao kini ang hinungdan nga grabe ka kusog ang uwan ug magpabilin ang ingon niini nga panahon hangtod sa Martes.
Mao kini ang gibutyag sa Philippine Atmospheric, Geophysical and Astronomical Services Administration (Pagasa) dihang hingpit nang nahimo nga bagyo ang low pressure area sa Hinatuan, Surigao del Sur.
Sa unang storm weather bulleting sa Pagasa, nasigpatan ang bagyo alas 10 sa buntag, Dominggo, Septiyembre 1, sa 405 kilometros sidlakan amihanang-silangan sa Hinatuan, Surigao del Sur o 510 kilometros kini sa sidlakan sa Maasin City, Southern Leyte.
Gadala ang bagyo og hangin nga 45 kilometros ang takna ug pag-unos nga 55 kilometros ang takna.
Base sa forecast sa Pagasa, dili ra hinuon kini mo-landfall.
Gibutyag usab ni Pagasa Visayas officer-in-charge Engr. Al Quiblat nga dili ra kini makapaubos og signal warning sa Central Visayas o sa Sugbo.
Sukad alas 8:00 sa buntag hangtod alas 4:00 sa hapon sa Dominggo, natala na ang 15 millimeters sa uwan o susama kini og 75,000 ka drum sa tubig nga gibubo sa Sugbo, base na usab sa natala sa Pagasa Mactan. (B)