SUPERBALITA CEBU

Nadela: Fire drill, earthquake

ASOY NI

Gipahibalo ko ni Edgar Tiro nga daghan na sa iyang mga silingan ang nakapalit og hard hat para sa ilang mga tinun-an.

Iyang gi-text nako ang ilang mga pangalan. Sila mao si Jenevives Guisando, Mary Ann Gumera ug Concepcion Mejeliano. Ang ilang mga anak naa magtungha sa Pardo Elementary School.

Kini si Edgar kon inyong mahinumduman maoy unang nisanong sa atong panawagan nga himuon natong mas alang sa mga tinun-an ang pagprotehir sa ilang ulo batok sa bisan unsa nga butang nga ilang masugatan kon dunay alarma sa sunog ug linog.

Ang gitudlo man gud sa eskwelahan mao ang pagpandong sa ulo gamit ang notebook ug libro. Gihimo kini matag fire ug earthquake drill diha sa mga eskwelahan.

Sakto man gihapon ning paagiha pero hasol kaayo kay ang duha ka kamot sa mga bata maghawid man sa libro ug notebook nga gipandong.

Aron nga kanunayng libre ang duha ka kamot, hard hat maoy angay nga ipuli.

Ning paagiha ang duha ka kamot libre na nga makapanghawid o makakamang kon gikinahanglan.

Susamang paagi atong gipailaila sa mga ginikanan sa Grade 7 sa Cebu Normal University Integrated Laboratory School niadtong Huwebes.

Atol ni sa Homeroom Parents Teachers Association (PTA) Meeting.

Wa hinuon hingpit nga giuyonan ang atong sugyot kay kinahanglan pa man nga ipananghid sa kadagkuan sa eskwelahan.

Apan daghan ang nipadayag og suporta sa maong lakang.

Sila nakasabot nga mahinungdanon kaayo nga libre ang mga kamot sa mga bata kong may sunog o linog nga mahitabo.

Tayming kaayo kay sa mosunod nga mga adlaw atong masaksihan sa mga pribado ug publikong tunghaan ang pagbansaybansay sa mga tinun-an sa mga angayng buhaton kon dunay alarma sa sunog ug linog nga ilang masinati samtang naa sila sud sa eskwelahan.

Sa ato pa ting fire ug earthquake drill na sab.

Atong gidasig ang mga sakop ug opisyal sa PTA nga tutukan og maayo ang maong drill. Kong duna moy nakit-an nga sayop o mga kausaban nga angay ipatuman palihug buhata dayon. Kon sa inyong pagtuo mas epektibo ang hard hat kay sa notebook ug libro, sagupa dayon.

Kining tanan para ra gyud sa kaayohan sa atong mga anak.

Hinumdumi nga pila ra na sila ka buok si Sir ug Ma’am nga atong gipamalihug pag-atiman sa atong mga anak samtang naa sila sa eskwelahan.

Busa di nato sila hikawan unsa man ang atong matabang aron mogaan ang ilang trabaho.

Suwerte gani kaayo kay naatol nga holiday kadtong 7.2 magnitude nga linog nga niigo sa Bohol ug Sugbo.

***

Dia pay lain nga gusto natong ipaambit sa tanan. Kabantay mo nga kon maabtan

ta og ulan ang dali nga reaction mao ang pagdagan aron mopasilong.

Mahadlok ta nga mabasa og hilantan, ubhon ug sip-onon. Nahibalo ba sab mo nga ang pagdagan nagtangag og dakong risgo.

Dako ang posibilidad nga madakin-as o ma-slide ta.

Kon ma-slide dako sab ang posibilidad nga mabalian ta og bukog. Kon kamoy papilion, bali o piang o hilanat, ubo ug sip-on.

Ang ubo, sip-on o hilanat sayon rang tambalan itandi sa piang o bali sa hawak, bukobuko, kamot ug tuhod kon ma-slide.

Nganong modagan man? Busa sunod higayon maabtan mo og ulan ayaw na gyud pagdagan.

Pagdala pirme og payong og kalo panagang sa ulan. (SuperBalita Cebu)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph