Sugilanon: Agay-ay

Ning hapuna malipayong nagkulokabildo ang magtiayong Kardo ug Miyat nga nag-atubangay sa tagsa-tagsa nila ka lingkuranang tuwang-tuwang nga ginama sa uway. Diha sila sa lagwerta, atubangan sa karaan nilang balay. Parehas na silang mitungtong sa edad nga 85, apan tuyhad pa kaayo ang pamayhon sa lawas ug abtik ug piskay pa kaayong molakaw ug manglihok-lihok sa ginagmayng buluhaton sa balay. Aduna silay duha ka katabang nga babaye nga pulos mga dalagang gulang sa edad nga 40 nga maoy nag-atiman kanila sa ilang pagkaon.

May duha ka anak sila si Kardo ug Miyat, lalake ug babaye, nga nangaminyo na. Pulos sila propesyunal. Ang lalake usa ka doktor; ang babaye CPA. Atua sila manimuyo sa siyudad ug magduawan lang kanila matag Sila ang naghatag sa ilang ginikanan og binulang suporta sa pagkaon, sinina ug kuwartang alawans.

Hinuon, nagdawatan man sab sila si Kardo ug Miyat sa halin sa abot sa ilang lima ka ektaryang umahan nga ilang gipasaupan sa mga mag-uuma sa baryo. Magdawatan sab sila sa ilang binulang pensiyon sa GSIS isip retiradong mga magtutudlo sa publikong eskuylahan. May binulan sab sila nga ayudang pinansiyal gikan sa lungsod isip mga senyor sitisen. Haruhay gihapon og kahimtang sila si Kardo ug Miyat sa ilang baryo bisan pa sa ilang pangedaron.

“Yat, morag giagay-ay na man ang mga haligi sa karaan tang balay,” matod ni Kardo nga mipahunong pagtuwang sa iyang gilingkuran.

“Aw, panahon na nga mosugot tang duha sa sugyot sa atong mga anak, nilang Arnel ug Myrna, nga gub-on kining karaang balay aron magtukod og bag-o, kongkreto ug modernong balay,” ni Miyat nga padayong nagtuwang-tuwang sa iyang lingkuranan.

“Bitaw, Yat! Di madugay, moabot na to sila si Arnel ug Myrna sakay sa ilang luhong mga sakyanan. Mosugot na lang ta nga gub-on kining karaan tang balay aron matukod ang bag-o, modernong balay!” miyango-yango si Kardo.

“Angay lang, Kards! Kay miabot na ang panahon nga giagay-ay na ang mga haligi sa karaan tang balay. Sama god nato, anaa na sab kanato ang agay-ay sa katigulangon. Nia na god ta sa atong kahapunon!”

“Oo, Yat. Ang agay-ay sa haligi sa kataan tang balay mapapas na kon mailisan na sa sementadong haligi sa bag-ong balay nga tukuron sa atong mga anak.”

“Sakto ka, Kards! Apan ang agay-ay sa atong katigulangon wa nay pagkapapas!” nagpanglingo-lingo si Miyat.

“Apan di ta magpadala sa atong agay-ay, uy! Pirme gihapon tang mag-ehersisyo sa the greatest exercise!” ni Kardo nga salabtunong mikihat sa asawa.

“Ese! Greatest exercise gyud! Kagar nang panuhod ta, Kards, uy!”

Kalit nga mikanaog si Kardo sa lingkuranan niyang tuwang-tuwang ug gibitad si Miyat. “Dali, Yat. Manulod tas atong kuwarto aron mawala kining atong agay-ay!”

Igo lang nakapanglingo-lingo si Miyat nga misagnunot sa na-kondisyon niyang bana paingon sa ilang kuwarto aron sulayan pagmatuod nga kaya pa nilang mag-romansa bisan anaa na kanila ang agay-ay sa katigulangon. (KATAPUSAN)