Dear Noy Kulas,
Maayong adlaw kanimo. Usa ako sa ganahan magbasa sa imong column. Tagoa lang ko sa ngan nga Ledy, 25, dunay kapuyo ug dunay anak.
Akong problema mahitungod sa akong live-in partner nga akong nasakpan nga dunay kuyog nga babayeng minyo sa usa ka motel. Naay nisumbong nako nga akong amiga nga unang nakakita nila sud sa usa ka coffee shop. Niadto dayon ko sa mall ug ako silang nakit-an nga maoy pagpanggawas. Gisundan nako kay nanakay sila og taxi.
Wa sila makabantay nga nagsunod ko nila hangtod na sa motel, diin sila nanulod sa usa ka kwarto. Akong gipataudtauran una nako giadto ug gituktok ang gisudlan nilang kwarto, Noy. Wa ko ablihi nila bisan ako nang gikusog ang pagtuktok. Gibadlong ko sa security pero akong giingnan nga akong kapuyo ang naa sa sulod.
Sila na ang mipagawas sa akong kapuyo ug sa babaye nga dakong minyo. Nakaila ko sa nawong sa babaye kay pareho ra og gieskwelahan ang among mga anak. Wa ko mag-eskandalo kay ako ra silang gipasagdan nga namiya.
Sukad ato wa na mi maayong tagdanay sa akong kapuyo. Noy, okay ra kaha nga magbuwag mi? Ang nakapait kay naa mi properties unya ang among anak suod niya. Unsa kahay rason niya nga kon body ug face lang, di to kalabaw nakong bayhana. Ingon ana diay ang mga lalake, di makontento og usa?
Please tambagi ko.
LEDY
Led,
Naa ra nimo kon imong pasayluon ang imong kapuyo o di. But for the sake sa inyong anak, mas maayo tingali, apan di pa karon. Di baya lalim nang luiban ka sa tawo nga imong gihigugma ug gisaligan. Apan kay bag-o pa man, ayaw una og desisyon. Huwata nga mokalma ka na or wa na ka sa kasuko ug kaguol.
But angay nimong mahibaw-an, di sayon ang imong pagabuhaton. Kay bisan maingon tang magkauli mo, dunay time nga moinit kag balik ug di nimo mapugngan ang imong kaugalingon, masuko ka kaniya ug maoy sinugdanan sa away.
Kon di man gani nimo makaya, ayaw na lang atha. Anyway, di man mo kasado, so, ang problemang komplikado mao ra ang pagbahin sa inyong properties nga napundar. But pray fof God’s guidance.
NOY KULAS
(Alang sa imong problema, e-mail sa kulassuper@sunstar.com.ph ug rojval69@yahoo.com)