NAGPAKURAT ang 16-anyos nga si Joseph "JV" Flores pinaagi sa pag-angkon sa ikatulong puwesto sa mixed open division sa bag-ohay lang nga 1st Metba-Davao Kadayawan Open Tenpin Bowling Championships nga gilusad sa SM Lanang Premier Bowling Center sa Davao City.
Si Flores nipaligdas og kinatibuk-ang 1,552 pinfalls sa tigi sa eliminasyon aron nga mahimutang sa ikaduha luyo ni national team bowler Merwin Tan kinsa nanguna nipaburak og 1,621 pinfalls. Ang naulahi niangkon sa unang puwesto ug sa twice-to-beat advantage padulong sa step-the-ladder finals.
Si Sletba's Jun De Guzman (1,549) maoy ikatulo, national team player Norel Nuevo (1,525) ikaupat ug Acbi-Prima sa Cebu's Manuel Nierra II (1,518) ikalima.
Sa step-the-ladder, si No. 5 Nierra nipabungkag og 201 pinfalls sa unang binigwasay. Iyang gikupo si No. 4 Nuervo (158) ug No. 3 De Guzman (170) aron nga makahan-ay og tigi uban ni No. 2 Flores sa ikaduhang tiniruhay.
Apan si Flores, napildi niini, nilukmay ngadto kang Nierra, 166-188.
Hinungdan nga si Nierra nakatakda og titular clash batok kang top qualifier Tan, kinsa mao ang kasamtangang Asian youth champion ug Philippine International 2019 Open champion.
Ang naulahi nisalig sa kadako sa iyang kasinatian pinaagi sa paglukmay sa nahiuna, 216-160, aron nga maangkon ang tropeyo sa kampeyon ug P60,000 ganting salapi.
Si runner-up Nierra nakadawat og P30,000 samtang si third placer Flores nibulsa og P15,000.
Si six-time world champion Rafael "Paeng" Nepomuceno nisungkit sa pinakataas nga single scratch game pinaagi sa pag-igo og 265 pinfalls.
Sa mixed youth division, si Tan milutaw nga kampeyon aron nga angkunon ang P15,000 batok sa sunod nga seventh placers Nuevo (P8,000), Andrea Alvizo sa STAI Bacolod-Prima (P4,000), Flores (P2,000), Metba-Davao's Uree Uy (P1,000), Ma. Vivienne "Yeyen" Flores sa Metba-Davao, Maverick Manuel ug JJ Besa sa STAI Bacolod-Prima.
Si Metba-Davao's Al Langkuno, Cesar Delfin ug Rene Dalayon nisikwat sa unang tulo ka mga puwesto sa mixed senior divisions. Si De Guzman maoy ikaupat, Rene Zabat sa Metba-Davao ikalima, Nepomuceno ikaunom, Sunny Tankit sa STAI Bacolod ikapito ug Jun Morales sa Metba-Davao ikawalo. Nakadawat sila og ganting salapi.
Ang bowlfest, nga nidani og 80 ka sumasalmot sa nasud, gitugtan sa Philippine Bowling Federation (PBF).
Sila PBF Trustee ug Treasurer Alexander Lim maoy nahimong halangdong bisita sa kalihukan samtang si Paeng Nepomuceno nideliber og inspirational message.
Si Davao City Councilor Jaffar Marohomsalic nihatag og mensahe ni Mayor Sara Z. Duterte-Carpio, samtang si Undersecretary Atty. Jo-Ann Burgos nagrepresenta kang Cabinet Secretary Karlo Nograles.
Si Metba Davao president lawyer Joseph Flores nagsulti, "The tournament was a huge success and we promise a bigger one next year."