TUGNAW nga buntag kaninyong tanan! Nagsugod na ang "ber-months" busa bugnaw ang hangin nga manuhutsuhot sa atong kaunuran matag buntag.
Medyo sayo natong nasinatian ang katugnaw tungod sa pagdagsa sa dagkong ulan. Niadtong niaging semana, nibunok ang ulan nga nakapabaha sa may bandang Bangkal, Davao City.
Hastang grabiha ang trapik dihang dapita tungod kay ang tanang dagkong truck og sakyanan didto na niagi sa mubo nga Puan "by-pass road" padulong sa Davao-Bukidnon Highway.
Puwera sa may gamay nga pasensiya kay atakihon sila sa alta-presyon kung moagi didto. Puwera kaguol sab unta sa atong pagpangandam sa umaabot nga pasko sa pagkatawo sa atong Manunubos.
Ingon nila nga ang pasko para lang daw sa mga bata apan para kanako ang pasko alang sa tanan isip pagpamalandong nga kitang tanan gasa ngadto sa uban.
Managkalahi ang pagdawat sa pasko sa matag usa. Ang uban nangandam sa daghang naglaray nga gimbuhaton hangtod sa bulan sa Disyembre.
Ang uban nangandam kung unsay ilang pagkaon, sapot nga isul-ob, lugar nga adtuon aron mobakasyon ang pamilya. May nagbuhi na og baboy, kanding ug baka aron maoy matadahon sa pasko.
May mga grupo ug asosasyon ilabi na sa probinsiya nga nag-ambag og amot matag bulan aron ipalit og hayop nga bahinon inig abot sa pasko. Ang among kanhi Kura Paroko nagsugyot nga dal-on sa tanang parukyano ang ilang pagkaon sa parish hall sa bisperas sa Pasko aron didto mangaon.
Ang matag gagmay'ng Kristohanong katilingban (GKK) mag-amot usab og 1-2 ka litson nianang panahona aron panag-ambitan sa tanan. Dugang sa panagtigi sa pag-awit, sayaw ug drama, sadya kaayo ang pagsaulog kay nangandam man sab si padre og mga regalo para sa iyang mga parukyano.
Nindot kini nga tradisyon og paagi sa bayanihan sa Pinoy kay si bisan kinsa makaambit og lamiang putahi ug maminusan sab ang usik kay walay malabay nga pagkaon. Nindot sab nga tradisyon ang pagpaanyag ug pagbutang ug dayandayan sa balay.
Sa ka-busy sa matag usa, wala nay panahon nga makahinlo ang tanan sa ilang balay gawas kung may dakong okasyon nga pangandaman sama sa pasko.
Busa panahon kini nga ipangguwa sa pamilya ang ilang tinaguang parol, Christmas tree, Christmas lights, ug uban pa nga anaa sa bodega o kahon sa balay og seguradong makahimo og "operasyon limpyo."
Alang sa mga relihiyuso, panahon kini aron mangandam sa kaugalingon sama sa pagpanginabuhi nga matarong og paghatag og gasa, tabang, serbisyo ug limos ilabi na sa mga nagkinahanglan.
Sa katapusan, ang mga bata ang labing malipayon sa pasko. Gawas sa mga gasa nga madawat gikan sa ilang mga ginikanan, paryente, ninong og ninang, masinati sa kabatan-onan ang mga nindot nga tradisyon sa ilang palibot.
Ilang mapaminawan ang mga awit ug sonata nga madungog lang nato sa panahon sa pasko, ang panag-ambit sa mga silingan og ang malipayong panag-uban sa pamilya. Sa laing bahin, akong timbayahon ang akong anak nga si Bradd nga nagsaulog sa iyang adlaw'ng natawhan kagahapon ug ni Kagawad Nonato "Dodong" Bolos sa Barangay Centro, Agdao niadtong Dominggo ug sa tanang nag-birthday karong bulana.