SUPERBALITA CEBU

Super Bilib: Butong iyang bugtong nga panginabuhi

17 KA TUIG: Huna-hunaa kon ikaw makaaguwanta ba sa panginabuhi nga ingon ani. Apan alang kang Jonny Pasigay, ang kainit ug kakapoy sa pagpamaligyag butong wa niya igsapayan mabuhi lang iyang pamilya. Sud sa 17 na ka tuig, mao na kini ang iyang gibuhi kanila. (Philip A. Cerojano)

UWAN, init ug kakapoy maoy kanunay gisagubang sa 39 anyos nga amahan nga mamaligyaay og butong matag adlaw aron mabuhi niya ang iyang pamilya.

Iya kining gibuhat sulod na sa 17 ka tuig.

Si Jonny Pasigay, nagpuyo sa Barangay Balirong, dakbayan sa Naga, adunay unom ka mga anak, ang kamaguwangan 18 anyos samtang kamanghuran 5 anyos.

Ang iyang mga anak puro nagtungha sa public school ug siya ray gisaligan.

Matag adlaw, mobiyahe si Jonny gikan sa Dakbayan sa Naga paingon sa Barangay Pasil, Dakbayan sa Sugbo aron pagpalit og presko nga butong gamit ang kurmata nga iyang giabangan sa dapit.

Sa hapon sa dayon nang sawop sa adlaw, mopauli siya sa Balirong.

Sa 17 ka tuig, ang iyang kita sa pagpamaligya og butong maoy bugtong niyang gibuhi sa iyang pamilya sanglit ang iyang asawa anaa ra sa ilang balay nag-atiman sa ilang unom ka mga anak. Usa sa iyang mga anak dunay suliran sa panglawas.

Lainlaing trabaho

Kaniadto, samtang didto pa sila sa isla Negros, gumikan lagi kay wala siyay taas nga edukasyon nga nakab-ot, taodtaod siyang nagtrabaho sa katubhan, nagmina og carbon.

Sa dihang naabot siya sa Cebu, nisulod siya isip construction worker.

Didto iyang naagian ang grabeng kakapoy samtang ang iyang sweldo niadtong higayona P85 matag adlaw.

Ang iyang kita di paigo nga ibuhi niya sa iyang pamilya bisan kon niadtong higayuna usa pa ang ilang anak.

Nagsugod

Niadtong 2002, iyang gisuwayan ang pagpamaligya og butong, diin tag P12 pa ang buok niadtong higayuna.

Usahay hangyuon pa og P10. Sud sa usa ka adlaw makahalin siya og 50 kabuok.

Sa pagkakaron, ang butong nga iyang baligya mapalit sa tag P30 nga iya usab inangkat sa Barangay Pasil.

Adunay panahon nga mahalinan siya og labing minos 50 ka butong.

Mapasalaton siya sa Ginuo sanglit aduna na siyay mga suki.

Ang iyang rota gikan sa dalan Junquera, paingon sa RR Landon ug subay sa Don Pedro Cui paingon sa Sanciangko ug balik sa barangay Pasil.

Iyang ibilin sa Pasil ang iyang baligya kon mouli siya.

Matag adlaw, si Jonny makaginansiya og P700 nga maoy iyang bawnon pauli sa ilang pinuy-anan para adunay magamit ng iyang mga anak pagkasunod adlaw.

Bisan sa iyang trabaho, gipasigarbo ni Jonny ang iyang panginabuhi nga tinarong.Bisan gamay, wala niya ikauwaw ang iyang matang sa panarbaho.

“Naa may uban nga mauwaw sa ingon aning trabaho. Apan ako dili ko angay mauwaw kay tinarong man ni nga pangwarta, dili mani binuang sama sa uban nga binuang ang pangwarta. Ang ako kay paagasan gyud og singot ba, kugi lang gyud para sa pamilya,”sulti ni Johny sa Superbalita Cebu.

Gihulagway niya nga sa iyang pagpanarbaho, ang pagbaligya og butong maoy iyang labing maayong nasugatan nga pangita sanglit kon nagtrabaho pa siya og opisina, labing siguro minimum nga sweldo ra ang iyang madawat.

Dugang niya nga bisan sa Dominggo, basta maayo ang iyang kondisyon, mamaligya gihapon siya bisan mingaw sanglit wala siyay income kon di siya motrabaho.

Ang iyang gipangayo sa Ginuo mao nga sa tanang adlaw, hatagan siya og maayong panglawas ug giyahan sa iyang paningkamot para iyang mabuhi ang iyang unom ka mga anak ug asawa.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph