ADUNA nay Small Town Lottery sa siyudad sa Lapu-lapu ang gitugotan sa Philippine Charity Sweepstakes Office nga maka operate sugod niadtong Dominggo, Septiyembre 1 human nga maka comply sa tanang requirement.
Sa gipagawas nga notice sa PCSO nga gipadala kang Roberto Medina ang President sa Lucky 7 Games and Amusement Corporation nga naka-address sa 211 Mangga Cacutud, Arayat Pampanga sila gipahibawo nga mahimo na sila nga makabalik sa ilang operation sa STL sa siyudad sa Lapu-lapu.
“With reference to the approval of the Office of the President on the resumption of STL operations, you are hereby directed to resume STL operations in Lapu-Lapu City commencing on 01 September 2019," base sa notisya nga gipadala.
Ang maong notice gipirmahan mismo ni Royina Garma ang General Manager sa PCSO nga pinitsahan niadtong Agusto 30.
Usa sa mga sinaligan sa Lucky 7 Gaming and Amusement Corporation nga wala magpa-ila nagkanayon nga niadto pang August 28, 2019 nakabayad na sila sa PCSO.
Naka bayad na sila og tulo ka buwan nga additional cash bond ug nakatuman sa mga rekisitos nga gipangayo sa PCSO.
Nakurat sila sa migawas nga balita gahapon nga nagpahibawo nga wala pay STL nga maka operate sa siyudad sa Lapu-Lapu ug sa siyudad sa Sugbo.
Usa sa mga opisyal sa Police Regional Office 7 nga dili lang usab magpahingan siya miingon nga gahapon pa nila nadawat ang order sa PCSO nga maoy hinungdan nga si General Debold Sinas nakapagawas sa pamahayag nga wala pay STL operator sa Lapu-lapu ang maka operate. (AYB)