SUPERBALITA CEBU

Task Force Baha gitukod

NITUKOD og Inter-Agency Task Force on Flooding (IATF) si Mayor Edgardo Labella nga maoy mosusi sa tanang gikinahanglan aron mapatuman ang P1.5 bilyones nga pundo sa dakbayan sa Sugbo sa tinguhang pagsulbad sa problema sa baha.

Ika-uban sa Department of Engineering and Public Works (DEPW) sa Cebu City Government ang 1st Engineering District sa Department of Public Works and Highways pinangulohan ni Engr. Florida Nuñez.

Gitudlo ni Labella isip point person si Atty. June Maratas kinsa maoy pangulo sa General Services Office ( GSO) kauban silang Atty. Jose Daluz III, Atty. Jerone Castillo ug Engr. Kenneth Enriquez sa DEPW samtang si Muñez ug kaubanan gikan sa DPWH.

Si Labella nagkanayon nga taliwa sa grabeng baha nga nasinati sa dakbayan sa Sugbo niadtong adlaw nga Dominggo apan wala sila nagpabaya kauban ang DPWH sa ilang trabaho.

Gipahibawo sa mayor nga ang kagamhanan adunay P1.5 bilyones nga flood control funds ang wa magamit sa miaging administrasyon nga mapuslan alang sa pagpatuman sa flood control program sa dakbayan.

“For this reason I constrained to create this Inter-Agency Task Force (IATF) to immediately make an evaluation, study for this flood control program both of the city and DPWH so that there will be no overlapping and there will be coherence,” dugang sa mayor.

Ang bag-ong pangulo sa 1st Engineering District nga si Nuñez nagkanayon adunay on-going nga P1.2 bilyones nga flood control project sa DPWH sa Cebu City nga naglakip sa Butuanon river ug sapa sa Tejero.

Apan gipadayag ni Nuñez nga ang ilang madali sa pagkakaron mao ang kanunay nga paglimpyo sa mga drainage sa siyudad diin ila na usab na-identify ang mga area nga sigeng bahaan nga maoy ilang tutokan sugod karon, gamit ang ilang 100 ka personnel sa maintenance.

Si Maratas sa iyang bahin nagkanayon nga mopahigayon ang IATF karong adlawng Huwebes ug Biyernes aron ilang itandi ang drainage master plan sa DPWH ug DEPW.

Gipadayag sa point person sa IATF nga base sa iyang pasi-una nga kasayuran, ang DPWH ni-focus sa ilang masterplan sa mga sapa apan ang DEPW nitutok ilang mga plano sa drainage nga kilid sa mga national highway sama sa dalan sa N. Bacalso.

Ang DPWH 7 adunay P8.2 bilyones nga pundo para sa flood control apan gipadayag ni Nuñez nga gitagi-tagi kini og download ang pundo paingon sa regional office para sa maong proyekto.

Ang Cebu City Government ug DPWH ug ubang mga volunteers maghiusa para sa umaabot usab nga massive clean-up ug dredging operation sa Mahiga creek diin ang DPWH maoy mopadala og mga heavy equipment para maoy mo-ugkat sa basura, lapok aron malawom ang maong sapa.

Unsa kadaghan

Susama sa 312,000 ka drums sa tubig nga giyabo sa Metro Cebu ang nasinati niadtong Dominggo, Septiyembre 1, nga nakamugna og baha sa pipila ka mga dapit.

Sa natala sa Philippine Atmospheric, Geophysical and Astronomical Services Administrat sa (Pagasa) Mactan sukad sa 8:00 sa buntag sa Dominggo hangtod alas 2 sa kaadlawon sa Lunes, niabot sa 62.4 millimeters ang uwan nga nasinati.

Matod ni Engr. Al Quiblat, officer-in-charge sa Pagasa Visayas nga alas 8 sa buntag hangtod 8:00 sa gabii o sulod sa 12 ka oras, niabot sa 57.8 millimeters ang uwan nga nasinati.

Ang matag millimeter sa uwan, susama kini sa 5,000 ka drums sa tubig.

Tungod gihapon ang maong uwan sa trough o extension sa Bagyong Liwayway.

Sa labing uwahi nga update sa maong bagyo kagahapon, Lunes, Septiyembre 2, anaa na kini sa 265 kilometros sa sidlakan sa Virac, Catanduanes diin pasaka na kini.

Dugang ni Quiblat nga gikan sa tropical depression nikusog kini diin anaa na kini sa tropical storm.

Nasayran nga niabot na sa 60 kilometros ang takna sa gidala nga hangin niini ug pag-unos nga 80 kilometros ang takna.

Gibutyag usab ni Quiblat nga posible pa kini nga mokusog bag-o mogawas sa Philippine Area of Responsibility sa Biyernes sa buntag.

Mas mokusog usab ang hanging habagat tungod sa maong bagyo apan dili na susama ang uwan nga nasinati niadtong Dominggo.

Anaa sa 192 millimeter ang average nga uwan alang sa buwan sa Septiyembre diin positibo ang Pagasa nga moabot kini.

Aduna’y duha pa ka mga bagyo ang gipaabot karong buwana.

Maayong panahon na ang mapaabot sa mga Sugbuanon sugod karong adlawa. (HBL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph