SI JUSTICE Secretary Menardo Guevarra niadtong Lunes, Septiyembre 2, niingon nga di siya makahinumdom nga nakadawat siya og hangyo sa pag-aprobar sa pag-release kanila ni kanhi Calauan mayor Antonio Sanchez ug Chiong convicts nga sila si Josman Aznar, Ariel Balansag ug Alberto Caño.
Sa samang hearing, gikompirmar ni Bureau of Corrections (BuCor) chief Nicanor Faeldon nga sila si Aznar, Balansag ug Caño gibuhian na gikan sa National Bilibid Prisons.
Ang release order gipetsahan og Agusto 16, 2019, apan di si Faeldon ang nipirma kon di si Correctional Institute for Women Superintendent Maria Fe Marquez.
Dihang gipangutana ni Senador Panfilo Lacson kon sila si Aznar, Balansag ug Caño gi-release na ba, si Faeldon nitubag nga “Yes, your honor.”
Atol sa hearing sa good conduct time allowance (GCTA) law nga gipasiugdahan sa Senate committee on justice and human rights, si Senate Minority Leader Franklin Drilon niingon nga ang life termers nga sila si Sanchez ug Chiong convicts di ma-release nga way pagtugot sa Department of Justice Secretary base sa usa ka executive order.
Iyang gitumbok ang Department Order No. 953 nga giisyu niadtong Nobiyembre 25, 2015, diin ang ikaduhang paragraph nagkanayon nga “the authority of the director general of the Bureau of Corrections to release national prisoners shall not apply to prisoners who have been sentenced to life imprisonment or reclusion perpetua or high-risk inmates whose release due to expired sentences shall only be implemented upon the prior approval of the Secretary of Justice.”
Si Sanchez gisilutan og pito ka life terms sa pag-rape ug pagpatay kang Eileen Sarmenta ug pagpatay kang Allan Gomez sa Laguna samtang sila si Aznar, Balansag ug Caño gisilutan matag usa og duha ka life sentences sa pag-kidnap ug illegal detention sa magsuong Jacqueline ug Marijoy Chiong sa Cebu.
“Unless this Department Order No. 953 has been modified, or recalled, or revoked, that seems to be the prevailing rule,” pag-uyon ni Guevarra.
Matod ni Guevarra nga iyang nakit-an ang executive order dihang ni-review sila sa meaning sa GCTA law.
“Since I assumed the position of DOJ in April last year (2018), I recall having received only a few requests for approval for the release of PDLs but this is not in connection with GCTA but in connection with what the BuCor calls STAL, or Special Time Allowance for Loyalty,” sulti ni Guevarra sa Senado. (MVI, Sunstar Philippines)