DUL-AN sa P12 milyones ang balor sa shabu nga nasakmit sa buwag nga mga operasyon sa kapulisan sa Sugbo, Lunes, Septiyembre 2, 2019.
Usa ka 15 anyos nga lalake nakuhaan og usa ka kilo nga shabu. Sa una nga operasyon sa mga sakop sa City Drug Enforcement Unit sa Cebu City Police Office, uban sa Provincial Drug Enforcement Agency ug City Intelligence Branch (CIB) sa Cebu City Police Office (CCPO) ug San Nicolas police pasado ala una sa Lunes sa hapon.
Ang buy-bust operation gipangulohan ni PLt. Mariel Ann Piedad, labaw sa CDEU.
Nadakpan ang duha ka manag-agaw nga sila si Dino Dela Cruz, 34, drayber sa usa ka electric bicycle (e-bike), ug ig-agaw niining si Carl Arresgado, 24, pulos lumolupyo sa L. Flores St., Barangay Pasil, Dakbayan sa Sugbo.
Nasakmit gikan sa duha ang 360 gramos nga shabu nga gibanabanang mobalor og P2.4 milyones base sa Dangerous Drugs Board (DDB) value.
Si Piedad nga nahinabi sa Superbalita Cebu nibutyag nga usa ka semana nilang gi-monitor ang manag-agaw human ang usa nila ka dinakpan sa Barangay Pasil sa nangagi nga mga ronda nihisgot sa ngan nila ni dela Cruz ug Arresgado.
Si dela Cruz mao ang momaneho sa e-bike.
Gibalhug ang duha sa Cebu City Police headquarters samtang gitrabaho pa ang mga kinahanglanon sa pag-file sa kaso.
Si Arresgado nga nahinabi sa Superbalita Cebu, niingon nga ikatulo pa nga higayon siya nahatdan.
Magpaabot lang siya sa text message kon kinsa ang sunod nga hatdan nga mag order dungan sa paghatag sa bayad.
Bayran sila og P6,000 kon mahurot na ang shabu nga gibilin kanila.
Kilo na
Sa lain nga buy-bust operation, binulto nga shabu ang nasakmit sa mga operatiba.
Pasado alas 2 sa Biyernes sa hapon, usa ka 15-anyos naluwas sa kapulisan human makuhai og kapin sa usa ka kilo nga shabu.
Ang buy-bust gihimo sa Sitio Mahayahay 2, Barangay Calamba, dakbayan sa Sugbo.
Moabot og P9.5 milyones shabu ang nasakmit gikan ni James (di tinuod nga ngan). Siya ang target sa buy bust operation.
Matod pa ni PMaj. Kenneth Paul Albotra, hepe sa San Nicolas Police Station kinsa mao usab ang nangu sa pagpang ronda, duha ka semana ang ilang pagpaniid kang James.
Dugang pa ni Albotra nga laing menor de edad ang ilang na luwas sa checkpoint sa milabay nga mga adlaw nga nakuhaan og 100 gramos nga shabu.
Si James i-turn over sa kapulisan sa Operation Second Chance sa Barangay Kalunasan, Siyudad sa Sugbo.