DINHI sa Sugbo giplano sa miaging Sabado ang pagpahigayon sa national convention sa Political Officers League of the Philippines (Polphil) karong umaabot Oktubre diin gilantaw ang posibleng pagsalmot sa mga dagkong ngalan sa politika sa nasud karon.
Tuyo sa grupo nga imbitahon ang mga posibleng iduso sa pagka presidente ug bise presidente karong umaabot 2022.
Samtang sayo pa sa pagkakaron, ato na mang malantaw kinsa kining mga ngalan nga dunay nasudnong kabug-aton. Dili pa kita siguro kon unsay ilang mga plano apan lakip na sila sa mga kwentada sa mga political observers ug kining grupo sa mga political officers.
Lakip sa mga gilantaw nga ituboy sa ilang mga tigsuporta mao silang Mayor Sara Duterte sa Syudad sa Davao sa administrasyon ug Bise Presidente Leni Robredo sa oposisyon.
Lakip sab silang Sen. Cynthia Villar nga maoy number one sa miaging piliay sa mga senador, si Sen. Grace Poe, nga nidagan pagka presidente sa 2016 ug number two sa piliay sa mga senador karong 2019, ug Sen. Manny Pacquiao.
Sa akong tan-aw, may posibilidad sab silang Sen. Ping Lacson nga nagsugod na karon og isag mga bug-at kaayo nga mga isyu ug ang batan-ong mayor sa Manila nga si Isko Moreno.
Bisan pa man og daghan pang mahitabo gikan karon padung sa 2022, mas maayong masugdan na natog kilatis kining mga posibleng ituboy alang sa pagka presidente ug bise presidente.
Faeldon
Malampusong makapanghunaw kaha karon Bureau of Corrections (BuCor) chief Nick Faeldon sa pagpagawas sa mga priso nga nakumbikto sa mga heinous crimes?
Matod pa ni Sen. Lacson, tulo sa mga nakumbikto sa pagdagit, paglugos, ug pagpatay sa managsuong Chiong pipila na ka dekada nga milabay nakagawas na kay kuno nagpakitag good behavior basi sa usa ka balaod nga napasar sa miaging administrasyon.
Apan ang maong balaod naglagda nga way labot ang mga nakumbikto og heinous crimes. Buot ipasabot, way labot diay ang mga Chiong convicts.
Gitaho nga nibalibad si Faeldon nga duna siyay kalambigitan sa maong mga kalambu-an sulod sa Bilibid Prisons sa Muntinglupa. Apan nasakpan nga namakakdiay siya.
Niguwa man gud sa miaging semana nga padung na unta sa pagbuhi si kanhi Calauan mayor Antonio Sanchez ug mga kaubanan nga nakumbikto tungod sa pagdagit, paglugos, ug pagpatay sa usa ka tinun-an sa UP Los Banos ug sa pagdagit ug pagpatay sa uyab niini.
Maayo na lang kay napugngan dayon human nireklamo ang mga paryente sa mga biktima. Tungod sa kadako sa balita, nimando si Presidente Rodrigo Duterte nga di siya buhi-an ug ipabalik sa prisohan ang ubang nakagawas na.
Si Faeldon mismo ang nipirma sa release papers ni Sanchez.
(@anol_cebu sa Twitter)