SAMA niadtong iyang gihimo sa dihang wala siya sa posisyon ug walay trabaho human siya mapilde ni kanhi mayor Mike Rama niadtong 2013 elections, makapaabot na usab kitang mohimo og mga lakang ang “laos nga pulitiko” nga si Tomas Osmeña aron paglawgaw sa administrasyon ni Mayor Edgardo Labella. O ba kaha gusto lang siyang mosalida sa publiko nga dako siyang buhi. Kon sa Tagalog pa “nagpapansin lang.”
Niadtong 2013 hangtod sa 2016 nga wala siyay trabaho, mihimo siyag mga lakang nga pang-publicity lang aron mahinumduman pa siya sa mga Sugboanon. Tiaw ba nimo nga nga bisan walay igong basihanan ug sukaranan, iyang gikiha sila kanhi city treasurer Diwa Cuevas ug 30 ka mga administrative cases sa sa Department of Finance ug sa Civil Service Commission.
Gumikan kay midepensa man ko ni Cuevas, giapil kog kiha. Cyber libel ug laing laing libel case sa Revised Pena Code. Gi-desisyon ug gi-dimiss ni RTC Judge Gilbert Moises base sa merito. Karon wala pa siya makadawat ug misang-at pag certiorari sa Court of Appeals aron ipabaliktad ang desisyon sa RTC.
Sa miaging semana, misang-at na usab siya og kasong kriminal ug administratiba sa Office of the Visayas Ombudsman batok nila ni Mayor Labella, City Attorney Rey Gealon ug City Administrator Floro Casas human gisalindot ang iyang hangyo nga ayuhon ang giguba niya nga opisina sa dihang mikanaog siya niadtong Hunyo 30. Iyang gipangkuha ang mga butang, giguba ang mga tiles ug kisame. Gikuha ang inidoro. Ambot unsay iyang sukaranan ug basihan.
Karon, nagplano na usab siya nga ikiha ang siyudad aron mabali-wala ang pagpabaligya sa South Road Properties (SRP) tali sa SM Prime Holdings, Ayala Land Inc., ug Filinvest kay alang kaniya illegal gyud ang maong transaksiyon atol sa panahon ni kanhi mayor Mike Rama. Klaro na pod kaayo nga pang-sabotahe kining iyang himuon. Ambot og kanus-a pa ni siya mohunong. Hunong na tawon, Tomas. (bobbygnalzaro@gmail.com)