NAKAPADUGANG sa pagduda kining pagbutyag ni Bureau of Corrections Director General Nicanor Faeldon nga di siya kahinumdom kon siya ba ang nagpirma sa release order sa tulo ka konbiktado sa kasong kidnapping ug serious illegal detention sa managsuong Marijoy ug Jacqueline Chiong.
Kini maoy iyang gibutyag atol sa Senate hearing kagahapon nga nagtuki kalabot sa Good Conduct Time Allowance (GCTA) law nga nagkunhod sa sentensiya sa mga piniriso. Apan ning balaora, gitataw nga way labot niini ang mga konbiktado sa heinous crime o mga dagkong kaso.
Gitumbok mao sila si Josman Aznar, Alberto Cano ug Ariel Balansag--ang tulo sa pito nga nakonbikto sa susamang kaso niadtong 1997. Ang laing upat mao sila si Francisco Juan LarraƱaga, Rowen Adlawan, James Andrew ug James Anthony Uy.
Nagpabilin sa bilanggoan sila si Adlawan ug ang duha ka managsuong Uy samtang si Larranaga kinsa usa ka Filipino-Spanish citizen, gi-extradite didto sa Spain.
Sa niaging semana, si Senator Panfilo Lacson, basi sa mga dokumento nga iyang nakuha, mikompirmar nga sila si Aznar, Cano ug Balansag ang nalakip sa dul-an 2,000 ka mga binilanggo nga gi-release tungod sa GCTA law.
Matod pa nga ang mga release orders pinetsahan og Agusto 16 ug usa ka Maria Fe Marquez, giingong technical superintendent sa Corrections, ang nakapirma sa maong dokumento.
Makapahibulong ni kay ubos sa balaod, ang Director General lang ang maka-approved sa release orders. So, kinsa may naghatag og gahum ni Marquez nga makapirman niini?
Kini maoy laing angulo nga angay na usab sutaon sa senado kay kon tinuod man gani ni dakong illegal ang pagpirma ni Marquez sa pipila ka mga release orders.