GIPANGITA karon ang suspek nga midagit sa bag-ong gihimugso nga batang lalaki sulod sa Puericulture, Barangay 16, siyudad sa Gingoog, Misamis Oriental.
Labihan ang kaguol karon nga gibati sa inahan nga si Marichu Villegas human iyang namat-an niadtong Septiyembre 1, 2019 nga wala na sa iyang tapad iyang anak. Gipakatawo niadtong Agusto 30, 2019 ang bata.
Nagtuo lang ang inahan nga gidala sa iyang mama nga maoy iyang watcher apan nadiskubreng wala sa kamot niini.
Pipila sa mga nakasaksi niingon nga mga alas 10 pa sa gabii namatikdan ang usa ka babaye nga nagsul-ob og face mask, itom nga jacket, brown nga short pants, mubo og buhok ug gibana-banang anaa sa 5'5 katas-on ug nakahinabi pa sa pipila.
Si Pamela Arayan Solarta, 19, taga Barangay Malinao, Gingoog, nakakita sa suspek nga maoy nikuha sa bata ug nibiya sa Puericulture Center.
Si Police Lieutenant Colonel Ariel Phillip Pontillas, hepe sa Gingoog City Police Station, niingon nga walay mga bahad nga nadawat ang magtiayon sa wala pa ang insidente.
Sa pagkakaron, padayon ang ilang panawagan kung kinsa ang nakakita sa maong deskripsyon sa suspek nga anaa sa social media pages nga ireport kanila.
Ang kagamhanang lokal sa Gingoog City ubos ni Mayor Erick Cañosa nihatag og P15,000 sa kinsa man makatudlo sa suspek.