NIHATAG og katin-awan ang National Union of Journalist (NUJP) Cagayan de Oro chapter sa paglambigit sa maong organisasyon sa New People's Army (NPA).
Kini human nipatim-aw ang duha ka mga kanhi sakop sa NPA nga sila si alyas Lalaine ug alyas Dina aron isaysay ang ilang kasinatian sa dihang anaa pa sa kabukiran ug gipanganlan niini ang mga gitawag nga frontline sa NPA nga mga organisasyon sama sa NUJP nga giingong gigamit aron makapagawas og mga balita nga dapig ngadto kanila.
Gibutyag ni alyas Dina nga sa nasayran niini dunay nisulod sa ilang grupo nga maoy nagpagawas og mga isyu batok sa gobyerno.
"Sa akong pagkahibalo ang NUJP, naay nisulod ana sa ilahang grupo ug ang organizer pud nga gimandoan pud sa (RUC) Regional Urban Committee diin naa pud siyay mandate gikan sa armado," matud niini.
Gidugang pa nga tumong niini nga mag-organisa og matag sector sa katilingban.
"Naay iyang purpose nganong kinahanglan siya mag-organize sa media aron makabig niya unsa ang panawagan sa armado. Pwedi niya madut-an nga kani nga isyu maoy gipagawas against sa government," dugang pa.
Samtang giklaro sa tsirman sa NUJP Cagayan de Oro chapter nga si Pamela Orias nga wala kini kamatuoran ug wala kini koneksiyon diha sa walhong grupo.
"Sa akong kaugalingon as chairperson sa NUJP karon, although na red tag na ta, pero kabalo man pud atong kauban sa Army. In fact, after na red tag, na appreciate gyud nako nga gi-reach out ta nila ug gi-clear na nila atong name ug ang NUJP mismo Cagayan de Oro nga wala kini koneksiyon sa NPA, walhong grupo intawon," matud ni Orias.