MAPASALAMATON ang tsirman sa Cagayan de Oro River Basin Management Council (CDORBMC) sa mga organisasyon nga nagpakita og suporta diha sa pagproteher sa kinaiyahan ilabi na sa river basin sa siyudad.
Girekognisa ug gipasidunggan ang ubay-ubay ka mga organisasyon nga duna nay gihimong pagpaningkamot alang sa pagproteher sa Cagayan de Oro River Basin ilabi na ang reforestation sama sa NGAs/GOCC/LGU mao ang Department of Environment and Natural Resources (DENR)-Northern Mindanao, Cagayan de Oro Water District (Cowd), Libona, Baungon ug Cagayan de Oro City samtang sa business sector mao ang Hineleban Foundation Inc., Ororama Megafarm, Del Monte Philippines Inc., Steag Power Inc., Oro Integrated Cooperative, First Community Cooperative ug Pilipinas Shell.
Samtang sa IPs/CSOs/Academia/Religious sector mao ang Mirayon-Lapok-Lirungan-Tinaytayan Tribal Association, Nahilaran CBFM, Unihitrico, Kitanglad Guard Volunteers ug Safer River Life Saver Incorporated.
Ang mga organisasyon usab nga mag palapad pa sa ilang restoration effort mao ang UC-1 Foundation Inc., Cagayan de Oro Bulk Water Inc., Oro Association of Rafters and Northern Mindanao Mountaineering Society, Development Bank of the Philippines, Mandaue Foam ug Wetlands International and Vitens Evides International.
Atol sa gipahigayong greening pinning niadtong Septiyembre 2 sa Grand Caprice Hotel, nagmapasalamaton si Archbishop Antonio Ledesma, kinsa tsirman sa CDORBMC, tungod kay makitang ubay-ubay ang naghatag og higayon ug pagpaningkamot alang sa kaayohan.
"We are grateful nga daghan karon nga mga participants who will share what theyre doing in helping to protect the watershed sa Cagayan de Oro," matud ni Ledesma.
Gidugang pa niini nga kini responsibilidad sa tanan ug gani naghangyo kini sa katawhan nga mogahin og gamay alang sa paggamit og tubig o sa kinaiyahan ilabi na kining gitawag nga Payments for Ecological Services (PES).
Samtang nibutyag usab si Dr. Hilly Ann Roa-Quiaoit, executive director sa CDORBMC, nga anaa sa mga 140,000 ektarya ang river basin ug mga kapin 1/3 ang angayang ma protektahan tungod kay wala na kini mga kahoy nga magpugong sa tubig, sagad sa pagdahili sa yuta ug delekado na nga dapit.
"We have around 45,000 that we need to restore, so that's like more than 1/3 of the river basin," matud ni Quiaoit.
Nasayran nga namugna ang CDORBMC niadtong Nobyimbre 16 tuig 2010 atol sa Multi-Stakeholders Meeting and Workshop nga gipangulohan sa Archdiocese of Cagayan de Oro ug DENR ug uban pa nga sektor diin tumong niini nga ma proteksiyonan, ma reserba, maatiman ug ma rehabilitar ang Cagayan de Oro River basin.