SUPERBALITA CEBU

Abogado gi-ambush, nagaras ra

INILA nga abogado sa Siyudad sa Sugbo nakalingkawas gikan sa duha ka mga tawo nga ning-ambush kaniya human kini niya basli og pusil.

Mao pay paggawas ni Inocencio dela Cerna sa Hall of Justice compound sa Qimonda Bldg. sa North Reclamation Area sa Siyudad sa Sugbo, dihang gisugdan siya og pusil sa duha ka mga tawo nga nag-angkasay sa motorsiklo, pasado alas 9 sa buntag sa Lunes, Septiyembre 2, 2019.

Alas 9:15 sa buntag motambong unta sa hearing sa kasong physical injuries si dela Cerna sa Branch 2 sa Municipal Trial Court in Cities, apan giuswag kini hinungdan nga nibiya siya.

Sakay sa iyang Toyota Land Cruiser si dela Cerna dihang siya gipusil sa nagbaktas nga gunman sa driver’s side, sigun sa usa ka gwardya nga nakasaksi sa hitabo.

Matod sa gwardya, kinsa nihangyo nga di magpaila, nga adunay pulis nga nakakita sa pagpamusil nga moresponde unta apan giunhan sa pagpusil sa gunman hinungdan nga mihapa kini.

Dali nga nahanaw ang gunman sakay sa usa ka motorsiklo.

Wa na makasunod pa ang pulis kay nag-escort kini og dinakpan sa korte.

“Kanang pagka hitaboa, naglakaw ra ang gunman. Paghuman sa buto, gisugat siya sa motor unya paghuman ato, naay niresponde pulis apan naunhan man pagpabuto ang pulis unya nakapadagan dayon ang mga suspek,” asoy sa gwardya sa Superbalita Cebu.

Gukdanay

Nipasirit sa pagpadagan si dela Cerna agi sa Sergio Osmeña street, apan pag-abot sa building sa Roble Shipping, giusban na usab siya pagpusil.

Lima ka mga buto sa armas ang nadungog ni dela Cerna, apan wa gihapon maigo ang abogado.

Nipadayon sa pagpadagan si dela Cerna ug padayon usab nga nagsunod kaniya ang riding in tandem.

Pag-abot sa eskina Alviola St. ug S. Osmeña St., naka stop signal ang traffic light, nikuha na siya sa iyang armas ug nakigpinusilay sa duha.

“Ni stop light naman gyud so wala na koy mabuhat ani niya. It’s either them or me. So, nanaog ko, nag-atubangay nalang gyud mi. Pagkakita nila nga nagdala na kog pusil, mituyok, niatras man sila,” matod ni dela Cerna sa interview sa sibyaanang dyLA.

Matod ni Police Chief Master Sergeant Ruth Bongo, imbestigador sa Waterfront Police Station, nga mga garas ra sa kamot nga agi sa bildo ang naangkon ni Cerna.

Adunay 11 ka mga bangag pinusilan ang sakyanan sa abogado. Upat niini sa walang windshield, usa sa atubangan samtang lima sa bildo sa passenger side ug usa sa luyo sa sakyanan.

Wa mailhi ni dela Cerna ang duha ka mga gunman tungod kay naka full-face helmet.

Unsay motibo?

Sa interview sa Superbalita Cebu, iyang gitug-an nga wa siyay hulga nga nadawat sa wa pa ang suway nga pagpatay kaniya.

Apan tulo ka mga anggulo ang iyang gitan-aw may kalabutan sa iyang gipanghuptan nga mga kaso.

Una mao ang multi-billion pesos nga high profile nga kaso nga gikalambigitan sa miyembro sa usa ka prominenteng pamilya sa Sugbo.

Siya ang gikuha sa pamilya nga mangabugar sa akusado, diin ang korte una nang nihukom nga di makapyansa ang iyang kliyente tungod sa kadako sa kaso nga gipasaka.

Ang iyang kliyente gitumbok nga nangawat sa P3.2 billion sa share sa stocks exchange.

Apan sa dihang siya na ang nihawid sa kaso, ni-file sila og petition for bail nga gitugotan usab sa korte.

“Dako kaayo ni nga mga kaso ba kay naa mi na koan karon nga most probable kay it involves billions. Gidepensahan nako ang kliyente unya kay dako man unya kay kuno iyang gikawat ang investment sa share of stocks didto sa Stocks Exchange and then niabot og P3.2 billion,” matod ni Dela Cerna.

Ang ikaduha niya nga gidudahan ang kaso nga usa siya sa naghupot nga nahitabo sa lalawigan sa Bohol, apan dinhi sa Sugbo gi-hearing ang kaso.

Ang star witness sa prosekusyon iyang gi cross examine nga matod niya, napamatud-an nga namakak.

Giingong adunay koneksyon sa military ang star witness ug hayan nisumbong nga gipakauwawan siya sa korte.

Dugang sa abogado nga daghan pa nga mga kaso nga mahimong maoy hinungdan sa suway nga pagpatay kaniya.

Nipaubos na siya sa imbestigasyon sa Cebu City Police Office ug misulod na ang Criminal Investigation and Detectioon Group (CIDG) 7 nga maoy nihatag kaniya og security.

Ang Mabolo Police Station nisusi na sa gipangmontar nga CCTV camera sa Quimonda apan guba kini duha ka semana na ang nakalabay.

Si dela Cerna mao ang ikatulong high-profile nga tawo nga gibanhigan sa pagbiya sa korte.

Niadtong 2018, si manlalaban ug Bise Mayor Jonah John Ungab namatay human gi-ambush sa iyang pagbiya sa Hall of Justice compound.

Sa Mayo 21, 2019, si Police Capt. Delfin Bontuyan gi-ambush ug namatay. Siya gikan nitambong sa mga hearing sa iyang mga kaso.

Security

Giawhag sa Regional Trial Court ang kapulisan sa siyudad sa Sugbo nga pabutangan og patrol car ang gawas sa Qimonda Building aron mobantay sa lugar kay nahimong banhiganan na ang gawas sa korte sa Siyudad sa Sugbo.

Si Police Colonel Gemma Vinluan nimando sa Mabolo Police station nga palawman ang imbestigasyon sa kaso ni Dela Cerna.

Gipa backtrack na usab ang mga kaso nga iyang gihuptan ilabi na sa gitug-an sa manlalaban nga multi-billion pesos nga kaso.

Giawhag usab ni Mayor Edgardo Labella si Vinluan sa pagbutang og pulis sulod ug gawas sa Qimonda building. (dugang taho nila ni PAC, ANV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph