ANGAYANG pulihan na si Andray Blatche isip naturalized player sa Gilas Pilipinas alang sa sunod nga international competitions nga salmutan sa Philippine national basketball team.
Mao kini ang gipadayag sa labing unang naturalized player sa Gilas Pilipinas nga si Marcus Douthit sa social media.
Ang sugyot ni Douthit, ang import sa San Miguel Beermen sa miaging Philippine Basketball Association (PBA) Commissioner’s Cup nga si Chris McCullough maoy ipuli kang Blatche.
“Chris McCullough should be the next naturalized big to carry Gilas!! My thoughts!!” mensahe ni Douthit sa iyang Twitter account nga napatik sa Spin.ph.
Wala na mohatag og dugang mga detalye si Douthit kon nganong mao kini ang nasulod sa iyang alimpatakan.
Si Douthit taodtaod sab nga nahimong naturalized player sa programa sa Gilas Pilipinas una siya gihulipan ni Blatche niadtong 2014 Fiba World Cup.
Si McCullough, kinsa miagak sa Beermen sa kampiyunato sa Commissioner’s Cup, mapasalamaton kang Douthit sa pag-endorso kaniya.
Nipadayag na’ng daan si McCullough nga andam siyang mahimong naturalized player sa Gilas Pilipinas kon itugot kini sa kahigayunan.
Sa laing bahin kabahin sa Gilas Pilipinas, nagkanayon si national coach Yeng Guiao nga wala na siya nakauyon nga kaduha na gipaubos sa random drug testing si Gilas guard Kiefer Ravena sulod lang sa usa ka semana.
Nagtahap si Guiao nga gituyo na kini sa FIBA nga ipaubos og balik si Ravena sa drug test.
“Parang hindi na random,” matod ni Guiao. “Parang hindi accurate ang word na random. Maybe they’re really picking on him. Kaka-blood test, kaka-drug test lang n’ya.”
Si Ravena bag-uhay lang nakahuman sa iyang 18 ka mga buwan nga doping suspension nga gipahamtang sa FIBA.
Mismong si Ravena nasurpresa nga giusban siya og drug test.
“I was a little surprised, my name being there (again), but like I said, I don’t take it personally,” pasabot ni Ravena.
“It’s part of the tournament I guess. They told us that at any part of the tournament, you can be called.”
Nasuspenso si Ravena kaniadto gumikan kay napositibo kini sa paggamit og performance enhancing drug.
Gipasabot ni Ravena nga wala kini niya tuyoa ug posibleng nakuha niya kini sa energy drink nga iyang naandang gamiton kaniadto. (ESL)