Dura: Di duphan si Faeldon

NAUKAY ang katawhan sa isyu nga nagbuhi sa mga kriminal nga nalambigit sa ngilngig nga krimen sa atong nasud.

Kini human hapit nakagawas ang kombiktado nga rapist-murderer ug kanhi Calauan, Laguna mayor Antonio Sanchez, kinsa gisentensyahan og pito ka life terms niadtong miaging semana.

Kung wa pa misinggaak ang sakop sa media ug netizens, hayan nakagawas na si Sanchez.

Gibasehan sa pagpagawas unta kaniya mao ang Republic Act 10592, kun Good Conduct Time Allowance, nga nagtugot sa mga kombiktado ug priso nga makabaton og dako nga pagkubos sa ilang silot tungod sa pagbinuotan sud sa prisohan.

Nindot ang balaod nga giduso niadtong 2013 tungod kay mahatagan og kahigayonan ang mga priso nga makagawas sa daling panahon.

Suma ni Bureau of Corrections (BuCor) Director Nicanor Faeldon nga tungod sa mando sa Korte Suprema nga ipatuman ang balaod, dunay 11,000 ka National Bilibid Prison nga priso, lakip na si Sanchez, ang ilang gibuhian.

Subay sa atong pagpanuki-duki, sukad 2014, ang BuCor nakapagawas na og 22,049 priso ilawom sa maong balaod, nga dunay 1,914 nga nalambigit sa bug-at nga kaso.

Di ikalimod nga daghan ang nabalik ang ilang kagawasan, apan angay nga susihon kini pag-ayo sa maong ahensya.

Tiaw mo nga nga sa mga nabuhian na, dunay lima ka mga Chinese drug lords nga gawasnon karon sa ilang kinabuhi.

Sanglit nakagawas na, basin gawasnon na sila karon nga nagnegusyo og druga.

Base sa datos ang mga priso nga nakombikto sa kasong murder, kidnapping, robbery, arson ug rape nga giilang heinous crime.

Ang makombikto ning kasoha bilangguon sa tibuok nilang kinabuhi, apan nakalingkawas sila tungod sa balaod nga gipatuman sa BuCor.

Sa nahitabo karon, angay nga susihon ang wa gidahum nga epekto sa balaod ug ang interes ni Faeldon nga kanunay masugba sa kontrobersya sama sa P6.4 billion shabu shipment ug karon ang pagbuhi sa mga drug lords.

Kung kinahanglan nga amendahan ang balaod, nan, amendahan kini. Ug kung angay kasohan si Faeldon, hinaut nga di siya duphan sa Pangulo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph