DAVAO DEL SUR -- Nalipay na ang gatusan ka mga sakop sa Kabus Padatoon (Kapa) Community Ministry International Inc. human mikatap ang mga impormasyon nga makabalik na kini sa operasyon.
Sa impormasyong nakalap sa Superbalita Davao, gitataw ni Gemma, 34, miyembro sa Kapa sa Bansalan sa nahisgutang probinsiya, nga nagpatawag na og tigum ang mga sinaligan sa organisasyon niadtong Lunes, Septyembre 2.
Laing sakop sab sa Kapa nga si Melvin, 25, nagbutyag nga mahibalik na sila sa operasyon sa katapusan ning bulan o di kaha sa Oktubre ug dili na 30 porsiyento ang "blessings" kun tubo sa kapital, sanglit anaa na kini sa 40 porsiyento.
Sa katapusang semana sa Agosto, nagpagawas og pahayag ang Securities and Exchange Commission (SEC) ngadto sa publiko aron ipasabot kon nganong di maabrihan ang Kapa.
Mismong si SEC Chairman Emilio Aquino nagkanayon nga: "We enjoin the investing public to be more discerning with and critical of any promises and persuasions made by fraudsters."
Si Aquino nagklaro nga adunay "freeze order" ang mga bank accounts ug ubang asset sa Kapa tungod kay gipadagan kini nga daw sama sa "Ponzi" scheme human gisaad nga padatuon ang mga kabus.
Gitataw sa SEC nga kini maoy hinungdan nga di na mahatag sa Kapa ang ilang gisaad sa mga investors nga mauli ang kuwarta ilabi na nga anaa pa sa korte ang kaso.
Apan daghan sa mga miyembro sa Kapa nagbutyag nga sa maong tigum gipalaum sila nga mabalik na ang operasyon niini. (Orlando B. Dinoy)