Sugilanon: Isla pulang rosas
KARON pa si Aldo makaanhi dinhi sa isla Pulang Rosas. Ang iyang Tatay Samuel maoy mag-anhian dinhi kay nindot lagi ang iyang dagat kay abunda sa isda. Anhi dinhi managat si tatay niya sa ulitawo pa kini ug dinhi usab ikahibalag ni tatay niya si nanay niya Gualdina. Usa ka babayeng taga isla Pulang Rosas ang iyang inahan, apan wala si Aldo dinhi ipanganak sa isla. Didto siya matawo sa balay sa iyang Lola Magda sa balangay sa San Gabriel. Nabiyudo ang iyang Tatay Samuel dihang ang nanay niya nga si Gualdina namatay dihang nagpangidaron pa siyag dos anyos. Ang namatyan sa iyang inahan mao ang hilanat nga magbalik-balik hangtod nga wala na kini makaagwanta ug namatay sa sakit nga kahibulongan.
Ug karon ania na si Aldo sa isla Pulang Rosas ug nia magpuyo sa karaang balay sa iyang Nanay Gualdina. Giganahan si Aldo sa isla kay nindot ang mga talan-awon dinhi, labi na sa panahon sa kahapunon. Ug daghan kaayong nindot nga mga bulak dinhi sa isla. Apan ang labing daghan nga miturok dinhi mao ang bulak nga rosas nga pula ang kulor nga maoy hinungdan nga ginganlan kinig isla Pulang Rosas. May usa ka dalaga nga nakapadani sa kasingkasing ni Aldo. Si Lelani, apo sa giilang maayong laki nga mananambal dinhi sa isla, si Tatang Nosoy. Usa siya ka albularyo ug tinahod sa taga Isla Pulang Rosas.
Usa niana ka higayon samtang nanuroy sila si Aldo ug Lelani sa dapit diin dunay daghang mga bulak, may gitug-an si Aldo sa dalaga.
“Gihigugma ko ikaw, Lelani!” ni Aldo ngadto sa dalaga.
“Nahadlok ako, Aldo. Basin imo lang kong pahilakon kon dawaton ko ang imong gugma,” hinay nga namulong si Lelani.
“Dili, dili ko gyud ikaw hatagan og kagul-anan, Lelani,” ni Aldo nga mikupot sa kamot sa dalaga.
Human sa taudtaod nga paghinuktok gidawat ni Lelani ang gugma ni Aldo.
Ang panaghigugmaay nila ni Aldo ug Lelani nahibaw-an ni Tatang Nosoy. Busa, gipatawag niya ang duruha.
“Kay gusto na man mong duha nga magminyo, panalanginan ko kamo, aron way dautang espirito nga mohatag kaninyo og katalagman. Sama sa nahitabo sa inahan nimo, Aldo, nga si Gualdina. Wala ko siya kahatig panalangin. Nasakit siya ug wala molungtad ang ilang panagluon ni Samuel sa kaminyuon, namatay siya.”
Unya may gikuha si Tatang Nosoy sa butanganan niyag mga tambal. Gipainom niya nilang Aldo ug Lelani ang posyon nga morag duga sa mga dahon.
“Gawasnon na kamong duha. Dili na kamo hilabtan sa abubhoang espirito sa Isla Pulang Rosas,” matod ni Tatang Nosoy.
Paglabay sa panahon nagmalipayon sila si Aldo ug Lelani sa ilang kaminyuon. Ug dinhi sa isla Pulang Rosas gipanganak ni Lelani ang ilang panganayng anak.
(KATAPUSAN)