NAHUTDAN na man tuod og paglaom ang Gilas Pilipinas nga makaabante sa sunod round sa 2019 FIBA Basketball World Cup apan adunay kalambuan nga makapabuhi og dugo sa mga sakop sa national squad.
Kini gumikan kay posible pang maka-qualify ang Gilas Pilipinas alang sa 2010 Tokyo Olympics human napilde ang host China batok sa Poland pinaagi sa overtime sa FIBA World Cup.
Sa mga kausaban nga nahitabo sa format sa FIBA, nga maoy basketball governing body sa kalibutan, ang World Cup gikonsiderar na nga usa sa qualifying events alang sa Olympics.
Pito ka teams gikan sa World Cup ang maka-qualify sa Olympics ug kini mao ang top two teams sa Europe ug Americans hasta ang No. 1 team sa Africa, Asia ug Oceania.
Sa kasamtangan, ang China naggunit og 1-1 nga rekord sa Group A sa World Cup unya kon mapilde kini sa katapusang tahas niini sa group stage batok sa Venezuela, hayan malagpot kini sa classification stage.
Ang Gilas Pilipinas ningdakin-as nang daan sa classification stage human kini nakatilaw og dagkong kapildihan sa premiro nilang tahas sa Group D batok sa Italy ug Serbia.
Kon wala’y teams gikan sa Asia nga makaabante sa sunod nga round sa World Cup, hayan ang classification stage maoy basihan sa pagpili og representante sa Asia alang sa Olympics.
Kon modaog ang Gilas Pilipinas sa katapusang tahas niini sa group stage sa World Cup batok sa Angola karong hapon, hayan adunay poruhan nga malabwan niini og posisyon ang China.
Apan gipasabot ni Gilas Pilipinas coach Yeng Guiao nga wala pa sila maghunahuna kabahin sa Olympics gumikan kay mas nagtutok sila sa ilang kampanya sa World Cup.
“Mahirap kasi isipin pa ‘yun eh. Ayoko muna mag-speculate doon sa Olympic berth, but I think China will have an inside track on that already,” pasabot ni Guiao sa interbyu sa www.abs-cbnnews.com. (ESL)