PWERTENG inita karon ang lingkoranan ni BuCor Chief Nicanor Faeldon.
Nagsugod ang kainit human mogawas ang balita nga libre na nga makagawas sa Bilibid si kanhi Calauan, Laguna Mayor Antonio Sanchez tungod sa Good Conduct Time Allowance (GCTA).
Makabungog nga reklamo ang misugat sa maong balita tungod kay daghan ang nagtuo nga dili pa angayan pagawson sa bilanggoan si Sanchez tungod sa kabug-at sa krimen nga pang-lugos og pagpatay nga iyang gihimo.
Ang GCTA nagmando nga kadtong buotan nga mga preso premyohan og pagkunhod sa sentensiya.
Kay nagbinuotan man kuno si Sanchez, mao nga gi premyohan siya hangtod nga napupos ang pipila ka tuig nga sentensiya unta kaniya.
•••
Napugos pagtubag si Faeldon sa mga reklamo.
Wala kuno siya mopagawas og order nga pagawson, hinuon mi-order siya nga sugdan ang proseso aron maka-apil si Sanchez sa benepisyo sa GCTA.
Midugang siya nga posible nga nasayop sila sa pagsabot sa maong balaod kay wala silay gipili nga binilanggo, bisan pa kon bug-at nga krimen ang ilang nahimo sama sa kaso ni Sanchez.
Tungod sa kainit sa maong isyo, naukay ang rekord sa BuCor hangtod nga gipatawag na sa Blue Ribbon Committee sa senado si Faeldon.
Nahibaw-an nga halos mo-dos mil na ka mga konbiktado nga mga binilanggo ang nakagawas sa presohan tungod sa GCTA.
Susmariosep.
•••
Maayo lang unta og tinuod nga mga buotan kadtong gipagawas na.
Buot ipasabot, samtang nagsilbi sila sa ilang sentensiya, ilang gipakita nga nagbag-o na sila og naghimo pa sila og mga binuhatan nga nagpamatuod nga mahimo na sila mobalik sa sabakan sa mga katawhan.
Premyohan sila tungod kay nagbinuotan sila.
Apan ang problema og gipremyohan og apil ang mga piniriso nga makabayad.
Mao kini ang gipasabot ni Senador Riza Hontiveros nga matod pa, sukad pa kuno sa 2013 ang bayranay sa GCTA.
Mahimo diay bayran ang GCTA?
Buot ipasabot, dili na kinahanglan magbinuotan ka kon duna kay kwarta, Ibayad lang nimo sa kurakot nga taga BuCor, presto, mahimo na ka dayon nga makagawas.
Husto ba kini?
•••
Naapil pa gani sa intriga si Sec. Salvador Panelo kinsang sulat ngadto sa BuCor gihimong ebidensiya nga siya mismo mi-endorso kuno sa sayo nga pagpagawas ni Sanchez pinaagi sa GCTA.
Buyno, wala hinuon mosugot ang BuCor sa pagpagawas ni Sanchez kaniadtong panahona.
Mibalibad kini sa gusto mahitabo sa anak ni Sanchez bisan pa kon mismo si Panelo na ang misulat sa BuCor.
•••
Kon sayop ang pagpagawas sa mga hapit dos mil ka mga piniriso tungod sa GCTA tungod kay nasayop pagsabot ang BuCor sa balaod, unsa may angay buhaton?
Mahimo pa ba nga dakpon og balik ang maong mga gibuhian nga mga piniriso?
Unsay basehan kon dakpon sila og balik?
Matod pa ni Senador Bong Go, heads will roll kuno.
Kinsang mga ulo ang moligid tungod sa pagpagawas sa maong mga piniriso?
Unsay mahitabo ni Faeldon?
Sa dihang gitudlo siya sa Bureau of Customs, naapil sab siya sa intriga sa gitawag og “welcome gift” nga 108 milyon ka pesos pagsulod niya sa BOC.
Gani, gi-preso siya sa senado tungod kay wala siya motubag sa mga pangutana sa mga senador kaniya. Human makagawas, gitudlo siya sa Office of Civil Defense hangtod nga gitudlo siya isip Hepe sa BuCor.
Gunitan pa ba siya ni PRRD o sikaran?