DAKO og matabang ang police visibility o pagpakatap sa kapulisan sa dakbayan aron pagsanta o kaminosan ang mahitabong krimen. Nasayod kita nga dili igo ang gidaghanon sa mga pulis kon itande sa populasyon ug gidak-on sa dakbayan sa Sugbo o bisan asang lokal nga kagamhanan sa Metro Metro.
Mao kini ang kamatuoran nga angay puy-an sa awtoridad. Hagit sa liderato sa pagbahig sa ilang pwersa ug pag-ila sa prayoridad nga dapit nga matutokan nga sagad mahitabo ang krimen, sama sa palibot ug duol nga kadalanan sa Hall of Justice sa Qimonda Building. North Reclamation Area, dakbayan sa Sugbo.
Usa kini sa mga dapit sa dakbayan nga nanghitabo ang mga krimen batok sa mga biktima nga gikan sa korte. Niadtong Lunes, Septiyembre 2, sa buntag, laing biktima sa pagbanhigan nga si Atty. Inocencio de la Cerna gikan nitambong sa iyang kaso apan giuswag ang husay hinungdan nga niuli lang dayon nianang alas 9:13 sa buntag.
Sumala sa usa ka sikyu nga nakakita sa panghitabo, ang gunman nag-inusarang naglakaw apan gitagbo sa usa ka nagmotorsiklo human sa pagpusil sa sakyanan ni de la Cerna. Gigukod sa riding-in-tandem apan wala makaplasada sa ilang pagpamusil tungod sa presensiya sa kapulisan sa dapit nitubag dayon sa alarma.
Kon wala pa ang mga pulis, ang riding-in-tandem seguradong makapwesto pag-ayo sa paggukod sa abogado, kinsa naluwas sa tino nga kamatayon. Dili ba dako ang natabang sa presensiya sa kapulisan?
Sa kinatibuk-an, ang paningkamot sa pagmintinar sa kahusay ug kalinaw sa kapulisan way kapuslanan kon way kooperasyon o pag-abag gikan sa mga sibilyan isip mga tigpaniid sa ilang dapit ug sekretong motaho sa awtoridad.
Ang kakuwang sa gidaghanon sa kapulisan natapakan sa nagpakabanang silbilya. Pulis ipakatap lang.