ARON pagdisiplina sa mga Talisaynon ug publiko kalabot sa hustong paghipos sa basura, pagpatuman sa Sanitation Code sa Siyudad sa Talisay, gipahugtan pa.
Gitug-an ni Bise Mayor Alan Bucao nga gi-review ang Solid Waste Management Code sa Siyudad nga niadto pang 2001 giumol.
Posible sulod ning buwana mogawas na ang pag-review, diin ipasar na sa committee hangtud na sa plenary. Matod ni Bucao nga usa sa gipatun-an nga pahugtan ang may labot sa pagpataas sa multa sa masakpan nga nagpataka og labay.
Gani ilang gitun-an nga lakip unya sa mga maka-penalty ang nakakita nga wa lay gibuhat, sama ba sa pagpamuyag o pagpunit sa basura.
Gitug-an kini ni bise mayor, human nga niabot gyud sa 34 metriko tonelada ang nahipos nga basura sa pagpanglimpyo sa Mananga river ug sa mga creek sa Talisay sa niaging semana.
Gitun-an na usab karon ang mga angay nga ma-amend sa ordinansa kalabot sa plastic ban, lakip na ang ban sa straw diha sa syudad sa Talisay. (FMD)