SA PAGSUGOD pa lang sa clamping sa mga sakyanan sa Dakbayan sa Mandaue niadtong Lunes, Septiyembre 2, 12 ka mga sakyanan ang na- clamp sa Traffic Enforcement Agency of Mandaue (Team) sud sa lima ka oras.
Apan giangkon sa Team head nga nagkinahanglan sila og dugang traffic enforcers alang sa mas epektibong pagdumala sa trapiko sa dakbayan.
Wa na pasayloa sa Team ang mga pribadong sakyanan, trucks ug trailers nga nagpataka og park sa kadalanan sa Dakbayan sa Sugbo sa Lunes sa buntag.
Moabot sa 12 ka mga sakyanan ang gi-clamp sa Team sa F.B Cabahug street, DM Cortes ngadto sa Cansaga, ML Quezon sa Barangay Maguikay ug Cabancalan.
Matod sa pangu sa traffic operations, Mario Gacko, nga usa sa ilang nakita nga mga problema sa pagpatuman sa ordinansa mao ang kakuwang sa mga tawo nga mopatuman ini, sanglit 220 lang ka mga personnel ang anaa karon sa Team.
“Para ato ma minimize pod ang traffic, puno tag personnel, mga 300 pod unta aron mas ma manage ang mga kadalanan kay every corner dapat naa gyud na siyay upat ka personnel. Para mukabya gyud bitaw siya kay kon naay maghinay hinay, i trigger gyud na siya nga magpaspas”, matod ni Gacko.
Ang mga sakyanan gipapitlan og pahinumdom ingon man citation ticket pagpahibaw nga kon pugson pagtangtang sa drivers ang clamp, posibleng sila mapasakaan og kasong kriminal.
Sa wa pa mapatuman ang ordinansa, una nang midayeg si Mayor Jonas Cortes sa Team sa pagkadena sa trailers nga giparada lang sa daplin sa national highway.
Alang kang Cortes, dako kini og tabang sa pagpamenos sa sitwasyon sa trapiko ilabi na nga labanganan sa mga sakyanan ang syudad. Padayon pa ang pag-clamp sa Team.
Pahibawo nila sa drivers nga dili biyaan ang sakyanan o kaha i-park sa mga lugar nga ilegal ug makahatag og kasamok sa kadalanan. (ANV)