BATAN-ONG ginang nga nilayas aron makapalayo sa iyang bana sa Bohol, giingong nalugos na hinuon sa drayber sa prime mover nga iyang gisakyan.
Nahilabtan gyud ang 23 anyos nga babaye subay sa resulta sa paghiling sa doktor kaniya human sa hitabo niadtong Dominggo sa kaadlawon, Septiyembre 1, 2019 sa Barangay Taloot, lungsod sa Argao, habagatang Sugbo.
Kini ang gibutyag ni PSsgt. Erna Solatorio, kinsa naghawid sa kasong pagpanglugos batok sa 32 anyos nga drayber.
Si Angel (di tinuod niyang ngan), 23, mopauli unta sa iyang yutang natawhan sa habagatang Sugbo human nilayas sa iyang bana tungod sa pagkaseloso.
Gikan sa usa ka lungsod sa Bohol, nagpakitabang si Angel sa mga tripolante sa usa ka cargo nga barko nga gisakyan og dagkong mga truck paingon sa Dakbayan sa Sugbo.
Tungod kay di igo ang pamasahe, namasin si Angel nga makasakay pauli sa iyang mga ginikanan. Gipasakay siya sa sa usa ka prime mover nga ang rota paingon sa habagatang Sugbo, duol sa lungsod nga gigikanan ni Angel.
Ang drayber nga si Richard (tinuod nga ngan gipapugngan sa pulis) sa way pagduha-duha, nisugot sa hangyo ni Angel.
Matod ni Solatorio nga natulog si Angel sa sakyanan samtang nagmaneho si Richard.
Pag-abot sa Barangay Taloot, nakamata si Angel ug nihangyo nga ihunong ang sakyanan kay mangihi siya.
Matod ni Angel, wa siya makabantay nga gisundan siya ni Richard, kinsa nabantayan niya human siya nakapangihi.
Nakurat si Angel nga anaa na sa iyang atubangan si Richard ug molingkawas unta siya, gibabagan ang iyang agianan.
Wa siya makapiog sa kusog ni Richard, nakuha ang iyang pagkababaye, tug-an ni Angel kang Solatorio.
Sa iyang kahadlok, nibiya siya ug nisakay og laing sakyanan pasaheroan sa iyang pag-uli sa ilang dapit.
Nisumbong siya sa nahitabo niya sa iyang mga ginikanan.
Ni-report sila sa kapulisan sa Argao, apan wa na maabti pa si Richard.
Sa grahianan sa truck sa lungsod sa Minglanilla na nila kini nasikop.
Si Richard nanghimakak sa Superbalita Cebu nga iyang gi-rape si Angel. Ang suspek nga napasakaan og kasong pagpanglugos naa sa bilanggoan sa kapulisan sa Argao.