WA PA dangti og usa ka semana sa dihang gisugdan sa kagamhanan sa dakbayan sa Lapu-Lapu ang road clearing operations sa illegal structures ug illegally parked vehicles nga nipid-pid sa dalan, anaa na sa 50 porsiyento nga napatuman ang maong operasyon.
Gipahibawo ni Assistant City Engineer Maribeth Soroño nga niadtong Agosto 27 gisugdan na nila sa paghinlo ang mga kalsada sa dakbayan lakip na ang interior roads.
Agi’g pagsanong sa memorandum nga giluwatan sa Department of Interior and Local Government (DILG) nga pinitsahan niadtong Hulyo 29, 2019 nga gibase sa direktiba ni Presidente Rodrigo Duterte sa pagpahawan sa kalsada.
“Reclaim all public roads that are being used for private ends. Marami diyan. And again, I ask Interior Secretary Eduardo Año to see to it that it is enforced,” tipik sa pamahayag sa presidente atol sa iyang fourth State of the Nation Address (Sona).
Kini gihingusgan sa presidente sa tinguha nga kalugakan ang nagkahuot nga dagan sa trapiko.
Matod pa ni Soroño nga sa wa pa sila magsugod sa pag-demolish sa mga illegal structures ug tow sa mga sakyanan, mipadala una sila og notisya ngadto sa mga hingtungdan tag-iya kabahin sa ilang operasyon.
Sumala pa adunay mga nisanong ug bolontaryong miguba sa ilang structures apan adunay pipila ang nagmagahi nga suway nagpalaban ngadto sa buhatan ni Mayor Junard Chan.
Nipasabot ang opisyal nga ang kilid nga bahin sa concrete pavement sa kalsada dili mamahimong parkingan og mga sakyanan ingon man tukoran og straktura.
Samtang sa mga kalsada nga way sidewalk mokuha ang siyudad og usa ka metros ug tunga gikan sa kilid sa dalan nga gikinahanglang hawan.
Atol sa operation kuyog sa team ang towing truck sa siyudad nga moguyod sa illegal parked vehicles ug dumptrucks nga maoy kargahan sa ginuba.
Nagkanayon si Soroño nga sud sa 60 ka adlaw ang gihatag nga tagal sa DILG aron hingpit nga kahawanan og bisan unsang obstruction sa dalan.
Ang mga kalsada nga gi-operationan na naglakip sa M. Patalinjug Avenue nanukad sa barangay Pajo lahos sa Marigondon area, dalan A. Tumulak sa barangay Gun-ob, S. Osmeña Street sa Gun-ob ug Poblacion, mga kalsada sa Looc, Locatha, Calawisan ug uban pa. (FVQ)