GIPATAWAG sa Mandaue City Mayor Jonas Cortes ang gatusan ka mga garbage collectors sa dakbayan kagahapon sa buntag, Martes, Septiyembre 2, 2018.
Kini gumikan sa obserbasyon sa mayor nga dunay pipila ka mga barangay nga nagpasad ang mga basura sa kadalanan. Matod ni Cortes nga kinahanglang seryusohon sa mga garbage collectors ang ilang trabaho.
“I decided nga ako ipatawag and tanang city paid or barangay paid collectors. Ako sila giingnan nga bisan kinsay misweldo sa ilaha, its the tax payers ang nagsweldo. Simple reminder lang to nga dili nato makalimtan labi na katong mga residential areas,” ingon ni Cortes.
Gawas niana, modugang usab og personnel ang mayor isip eco-wardens.
“Naay mga barangays nga wala pa gyud ka fully implement sa garbage collection. Unya ako giingnan ang mga barangay captains. mag meeting mi within the week nga ato hisgutan ang kakuwang sa garbage trucks ug kakuwang sa eco-wardens,” dugang niya.
Ang eco-wardens maoy mamadlong sa mga mohimo og kalapasan sa environmental laws. Sama lang sa pagpataka ug paglabay sa basura.
Dili usab sila city paid o kaha barangay paid apan hatagan sila ug 50% nga komisyon gikan sa multa sa mga nakalapas.
Apan matod sa chairman sa committee on environment, oonsehal Jun Del Mar, nga mokuha usab sila og mga volunteers nga mopaubos sa pagbansay-bansay.
“Depende sa mo-qualify sa barangay, they will undergo training gyud nga massive training kay di mahimo ato lang buhian, para makapanakop sad,” matod ni Del Mar.
Hinuon, alang sa mga garbage collectors, usa ka dakong hagit nila ang pahimangno sa mayor. Ilang giangkon nga aduna gihapoy mga gahi og ulo nga molabay lang bisan asa ug dili usab mo-segregate sa ilang mga basura.
Sa pagkakaron padayong naglabay sa landfill nga nahimutang sa Binaliw, dakbayan sa Sugbo bisan pa man og gidid-an na kini sa Cebu City.
Wa isalikway ni Cortes nga posibling mobalhin sila sa paglabay sa basura sa usa ka luna sa Consolacion. (ANV)