GI-MONITOR sa Cebu City Police Office ang tulo ka mga kombiktado sa kasong murder sa managsuong Chiong niadtong 1997 human nakabenepisyo sa good conduct time allowance (GCTA) niadtong Agusto.
Matod ni Police Colonel Gemma Vinluan hepe sa CCPO, wa pa silay impormasyon kon naa na sa Siyudad sa Sugbo ang tulo nga silang Josman Aznar, Alberto Caño ug Ariel Balansag.
Iyang gipasabot nga kon gi-pardon na ang tulo, wa na silay mahimo niini ug di na sila mahimong dakpon tungod kay legal ang pagpagawas kanila.
Apan kon adunay kamandoan ang korte nga sila dakpon pagbalik ug suguon sila sa pagsikop, diha-diha dayon pangitaon kini sa kapulisan.
“Kung binigyan sila ng pardon, natural di natin yun hulihin. Pero i wa-watchlist natin sila, kumbaga, isa sila sa mga imo-monitor natin ang mga activities. Wag silang magkakamali. Kung itoy may court order, di tayo mag dadalawang isip na ipaaresto sila,” matod ni Vinluan.
Dako siyang supak sa pagpagawas sa mga kombiktado sa heinous crimes itandi sa mga gagmay og kaso nga mipakitag maayong batasan sa sulod sa bilangoan.
Si Regional Trial Court (RTC) 7 Executive Judge Macaundas Hadjirasul nagdumili pagkomentaryo sa GCTA ug sa pag release sa tulo ka kombiktadong Sugboanon sanglit trabaho kini sa Bureau of Jail Management and Penology (BJMP) ug Bureau of Correction (BuCor).
Plea Bargaining
Samtang hugot usab nga gisupak ni Vinluan ang pagbuhi sa mga dinakpan sa anti drug operation pinaagi sa plea bargaining.
Matod sa CCPO director nga maghatag lang kinig problema sa katilingban tungod kay mahimong molambo ang kanhi street pusher ngadto sa big time drug player tungod sa iyang naila-ila nga mga drug lord sa sulod sa bilanggoan.
Kadtong mga nadakpan nga nakuhaan lang og ubos sa 5 gramos, mahimong makapahimulos sa plea bargaining ang dinakpan ug pagawason sa BJMP.
“Pag nasa loob na yan at naka kilala na yan ng mga big time drug lords sa loob, paglabas nyan big time na rin yan. Kaya ang ginawa naming mino monitor yung naka laya na,” matod ni Vinluan.
Mahimong mabutang usab sa peligro ang kinabuhi sa mga pulis tungod kay posibling balikan sila sa mga durugista inig gawas sa bilanggoan. (AYB)