PATAY ang duha ka mga suspek sa pagpusil patay sa usa ka pulis sa lungsod sa Minglanilla sa managlahing mga police “hot pursuit” operation niadtong Lunes sa hapon, Septiyembre 2.
Ang duha giingong ningsukol sa mga pulis nga nihimo og follow-up operation pasado alas 5 sa Lunes sa hapon sa lungsod sa San Fernando ug Dakbayan sa Carcar.
Gituohan nga frat war ang sinugdanan sa krimen ug naangin lang si PSr. Sgt. Alfredo Pagaling, kinsa nagpatrolya niadtong kaadlawon sa Agosto 31, 2019.
Si PMaj. Lymel John Pasquin, hepe sa lungsod sa San Fernando, niingon nga ni-serve sila sa warrant of arrest sa kasong murder ni Jessie Harold Manugas, 31, taga Barangay Sangat, San Fernando.
Ang warrant giluwatan ni Judge Joy Redoble sa Branch 77 sa Regional Trial Court (RTC).
Inay motahan sa ilang pag-abot, si Manugas giiingong namusil sa kapulisan hinungdan nga siya gibawsan ug namatay.
Matod ni Pasquin nga nakuhaan si Manugas og .357 caliber revolver ug mga bala sa armas sulod sa iyang balay, ingon man mga pinakete sa shabu.
Dugang ni Pasquin nga si Manugas nahibaw-ang sakop sa usa ka fraternity.
Patay usab sa dakbayan sa Carcar sa hot pursuit operation sa hiniusang followup sa kapulisan sa Talisay, Minglanilla, San Fernando ug Dakbayan sa Carcar. Uban kanila ang mga sakop sa Regional Special Operations Group 7 ug Provincial Intelligence Branch sa Cebu Police Provincial Office.
Si PSSgt. Remon Amanse sa sa Carcar City Police Station niingon nga gihimo ang operation sa Sitio Cambuntan, Barangay Bolinawan, alas 5:20 Lunes sa hapon
Giila niya ang napatay nga si Jesner Fernandez.
Nakuha sa mga pulis sa posisyon ni Fernandez ang usa ka .357 caliber revolver.
Samtang 72 anyos nga lolo ni Fernandez nga si Lomeriano gidakop human usab makuhaig pusil.
Nganong nailhan
Gideklarar nga sulbad na ang kaso sa pagpatay ni Pagaling sa pagkamatay nila ni Fernandez ug Manugas.
Gikompirmar sa hepe sa lungsod sa Minglanilla nga ang duha nga napatay mga suspek sa pagpusil patay ni Pagaling.
Sa wa pa diay pusila si Pagaling, sila si Fernandez ug Manugas giingong namusil sa usa ka sakop sa karibal nilang fraternity sa Dakbayan sa Talisay.
Ang ilang biktima, kinsang ngan gipapugngan sa kapulisan, maoy niila kang Fernandez nga nipusil kaniya niadtong Sabado sa kaadlawon sa Dakbayan sa Talisay, mga usa ka kilometro sa nahimutangan sa patrol car nila ni Pagaling ug Corporal Allan Villasurda sa Barangay Linao-Lipata, Minglanilla.
Human sila mamusil, nanibat sila si Manugas ug Fernandez nga nag-angkasay sa motorsiklo padung ngadto sa southern Cebu.
Sa ilang pag-abot sa Linao-Lipata, ilang nakit-an ang patrol car nga nag-park sa atubangan sa convenience store.
Gituohan nga nagduda sila si Manugas ug Fernandez nga kini blocking force, ila kining gipusil.
Si Pagaling nga maoy driver naigo ug namatay samtang si Villasurda wa maunsa.
Nasubay
Matod ni PCapt. June Tabigo-on nga Lunes sa buntag lang nakamata ang biktima sa pagpamusil sa Siyudad sa Talisay.
Dihang gipakitag hulagway, iyang gitudlo si Fernandez nga maoy nipusil kaniya.
Ang motorsiklo nakuhaan og footage sa closed circuit television (CCTV) camera nga nagpabuto ngadto sa patrol car nga gimaneho ni Pagaling.
Mao usab kini ang gisakyan sa duha ka mga tawo namusil sa Talisay, lakip na ang description sa duha.
“Patuloy pa rin ang imbestigasyon kung sino sa kanilang dalawa (ang bumaril kay Pagaling), pero silang dalawa ang positively identified, through the pictures shown to the victim (Talisay shooting incident), including sa witnesses, na sila talaga ang bumaril dun sa Talisay, subsequently dumiretso sila, kaya nga nag-strafing dun sa ating mobile patrol, na tinamaan naman yung ating pulis (Pagaling),” matod ni Tabigo-on.
Positibo nga giila sa biktima ug mga saksi sa Siyudad sa Talisay sila si Fernandez ug Manugas hinungdan nga ilang gi-background check.