BISAN unsa nato ka makasasala, gihigugma gihapon kita sa Diyos.
Ang Iyang gugma wa pa gyuy kondisyon. Mao ni ang rason kon nganong Iyang gipadala dinhi ang iyang bugtong anak nga si Hesukristo.
Nagpalansang si Kristo sa krus aron pagtubos kanato gikan sa mga sala dinhi sa kalibutan.
Sa wa pa Siya gilansang, Iya unang gipas-an ang krus samtang gikastigo Siya og maayo.
Si Mayor Socrates Fernandez nga naila sa angga nga Brod Soc tungod sa iyang pagka Catholic Faith Defender, naa sab niining talagsaon nga gugma sa iyang sinagop nga si Joavan.
Bisan giunsa na lang siya sa pagsaway tungod sa iyang paglaban sa iyang sinagop, wa gyud niya kini igsapayan ug paminawa.
Sa giingong pagpanion sa iyang anak sa usa ka sikyu nga nibadlong kang Joavan sa kalangas sa iyang motorsiklo, niluwat gyud siya og opisyal nga pamahayag.
Siya pa ang imbestigador ug abogado sa iyang anak base sa iyang pamahayag nga gipadala ning mantalaan.
Ambot unsa na sab kahay iyang buhaton ning lain nga insidente nga nalambigitan sa iyang sinagop nga giingong nanion og nars.
Wa may bati sa paghigugma sa ginikanan ngadto sa anak bisan unsa pa kini nga klase sa pagkatawo.
Apan kon ang paghigugma sa mayor nagtabon sa mga sayop sa iyang anak di na sab kini maayo.
Di kini maayo kang Joavan mismo kay kon magpadayon siya ning iyang taras, magkadaghan ang iyang kontra ug mga tawo nga mangasuko niya.
Mas maayo pang ipa-rehab na lang sa mayor ang sinagop kay mas luwas pa hinuon ang iyang sinagop gikan sa kakuyaw.
Kon iya ning pinangga, mao ni ang labing maayo niyang mabuhat alang sa iyang anak.