Bata nabalik na; bayot sikop

GINGOOG CITY. Si Richard Bernades alyas Jen-jen (naka-green), 20, gitumbok nga midagit sa bag-ong natawo nga bata sulod sa birthing home sa Dakbayan sa Gingoog nasikop sa kapulisan human sa gipahigayon nga police operation. (Gingoog City Police Station/Tsip Aye)
GINGOOG CITY. Si Richard Bernades alyas Jen-jen (naka-green), 20, gitumbok nga midagit sa bag-ong natawo nga bata sulod sa birthing home sa Dakbayan sa Gingoog nasikop sa kapulisan human sa gipahigayon nga police operation. (Gingoog City Police Station/Tsip Aye)

DAKPAN ang usa ka bayot nga maoy gitumbok nga midagit sa bag-ong gihimugso nga bata sulod sa birthing home sa Puericulture Center, Barangay 16, dakbayan sa Gingoog, Misamis Oriental.

Gibutyag ni Police Lieutenant Colonel Ariel Phillip Pontillas, hepe sa Gingoog City Police Station, nga mga alas 6 sa gabii niadtong Septiyembre 2, ang magtiayon nga sila si Rigedor Alwayan Precillas ug asawa nga si Nancy, taga Purok 2A, Barangay 19 susamang dakbayan midangop sa ilang buhatan ug gidala ang bata nga ilang giingong nakita sa abandonadong balay sa dapit nga naghilak.

Nadungog kini ni Rigedor hinungdan daling gikuha apan pamahayag sa duha gidudahan sa kapolisan tungod kay atol sa interogasyon, giingong wala magkapareha ilang mga pahayag.

Ang bata positibong naila sa iyang inahan nga si Marichu Tolorio Villegas.

Sa wala’y hunong nga imbestigasyon sa kapolisan ug pag-analisar sa nakuha sa CCTV sa midagit sa bata didto ilang nakita nga padulong sa Barangay 19 ang suspek.

Dunay nagsulti nga bayot ang nikuha apan nakapalibog sa kapolisan nga duna sab miingon nga babae kini. Tungod sab sa dakong tabang sa social media ug tinabangay sa katawhan, “Murag na pressure ang bayot kay nangita naman gyod mi kapolisan, tanan daghan nangita ug iyang gibilin sa silingan didto duol sa magtiayon,” matud ni Pontillas ug niingon nga ilang gisubay ang barangay kon dunay bayot sa dapit.

Dihang natumbok ang puloy-anan, ang inahan mismo niini miapela sa polis nga dili kini pasakitan.

Ang bayot giilang si Richard Bernades alyas Jen-Jen, 20, kinsa niangkon nga Hermaphrodite. Nagpasabot nga lalaki nga pwede magkaanak.

“Sa akong pagsabot lang ha, obsession of having a baby,” matud ni Pontillas ug midugang nga daw pwede kaayo niini magka baby apan sa legal nga paagi.

Butang nga mao sab gikumpirmar sa bayot tungod kay buot niyang magkaanak kay dili sab niini bout bulagan sa uyab.

Aminado ang bayot nga namabdos na siya kaniadto apan nakuhaan lamang.

“Duha kabuok akong hormones bali male ug female,” matud sa suspek.

Sa pagkakaron, detinado na sa presinto ang suspek kinsa gitakdang mag-atubang og kasong kidnapping. Ang ginikanan sab sa bayot labihan ang pangayo og pasaylo dili lang sa pamilya sa bata apan lakip ngadto sa mayor sa Gingoog.

Gipasalamatan sab ni Mayor Erick Cañosa ang kapolisan sa walay puas nga pag-imbestigar ug sa wala ra miabot og 30 oras nasulbad ang kasong kidnapping nga sobrang gikagoul ug gikabalaka sa pamilya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph