“SHOOT-TO-KILL nana, kay illegal ang pagpagawas nila, angayan lang dakpon...i shoot-to-kill” kini ang pamahayag ni Thelma Chiong sa interview sa GMA 7 Balitang Bisdak.
Si Chiong ang inahan sa magsuong Marijoy ug Jacquiline nga gilugos ug gipatay niadtong dekada 90.
Daw sa muboto ang dughan sa kalagot sa magtiayong Dionesio ug Thelma Chiong sa dihang misaysay sa pag pagawas nilang Josman Aznar, Alberto Caño ug Ariel Balansag human maka benepisyo sa good conduct time allowance (GCTA).
Matod ni Dionesio nga dili na sila moadto pa sa Senado alang sa himuon nga Senate Inquiry tungod kay dili na sila ganahan nga mag sige pag hisgot gumikan kay ang ilang gusto dakpon pagbalik ang tulo.
“Daghan na silag nasad-an nga nangasuko nila, sila ang angayan nga mahadlok kay basin matokhang sila,” matod ni Dionesio Chiong sa interview sa GMA7 Balitang Bisdak.
Si Police Brigadier General Debold Sinas hepe sa Police Regional Office 7 giawhag usab sa Senado nga tabangan sila nga pangitaon ang mag asawang Dionesio ug Thelma Chiong aron patambongon sa hearing.
Ang hepe sa Cebu City Police office nag umol og team nga maoy mo monitor sa tulo ka mga sugboanon nga kombiktado sa kasong murder sa mag suong Chiong kung naa na ba sila sa siyudad ug lalawigan sa sugbo.
Wala pay nadawat nga kamandoan si Police Colonel Gemma Vinluan gikan sa korte o sa Senado nga dakpon pag balik ang tulo ka mga Sugboanon nga gi kombikto sa kasong paglugos ug pagpatay sa magsuon.
Kung aduna nay mando nga silang Aznar, Caño ug Balansag ibalik sa bilangoan tungod kay illegal kini ug ilhon na nga pinangita sa balaod pangitaon nila kini.
Apan sa pagkakaron gi monitor lang una kini sa kapulisan sa siyudad sa Sugbo diin nag umol na silag team nga maoy tahasan niini.
Gani aduna na siyay gipagawas nga personnel sa pag adto sa mga lugar diin nag puyo ang mga kabanay sa tulo.
"Nasa watchlist para I monitor natin sila sa labas. Wala pa akong official report (kung naa ba sila sa Cebu) pero nagpalabas na ako ng mga taong mag momonitor kung nandito ba sila sa Cebu City.Yung address nila before, pinapa confirm natin kung andito ba sila sa Cebu City,at kung andito ba ang kanilang mga ari-arian nandito pa ba sila?" matod ni Vinluan.
Wala pa sad maka dawat sa impormasyon si Vinluan kung naabot naba sa siyudad sa Sugbo ang tulo o naa pa ba nag puyo dinhi ang ilang mga pamilya. (AYB)