USA ka estudyante nangutana sa iyang maestra, “Ma’am, silotan ba ko nimo sa butang nga wa nako mahimo?” Tubag sa maestra, “Dili. Ngano gud tawon nga silotan ka sa wa nimo mahimo?” Nalipay ang estudyante ug niingon, “Salamat, Ma’am, kay wa ko makahimo sa akong homework.”
Mas malipay ang mga estudyante kon mapasar ang House Bill No. 3611 nga gipasaka ni Deputy Speaker Evelina Escudero sa Sorsogon nga magpatuman sa “no-homework policy” gikan sa kindergarten hangtod sa high school.
Matod pa ni Escudero, mosangpot kini sa dugang quality time alang sa pamilya samtang ang estudyante anaa sa lang panimalay. “Homework assignments can deprive students and parents precious quality time for rest, relaxation and interaction after school hours and even on weekends,” matod pa niya.
Pagkahuman sa klase, ideposito sa mga estudyante ang ilang mga libro didto sa ilang eskuylahan aron di sila mabuktot og pinas-an sa bug-at kaayo nilang mga school bags nga puno sa mga libro ug notebooks.
Susamang balaudnon, ang HB 3883, nga gipasaka ni Quezon City Rep. Alfred Vargas, magdili sa homework sa weekends, sa Sabado ug Dominggo. Gitubag na kaha ang pag-ampo sa mga estudyante nga tapulan ug taspukan nga mobasa ug magtuon?
Designated survivor
Kinsay nagdahom nga ang salida sa Netflix nga “Designated Survivor” mahimong inspirasyon sa usa ka balaudnon?
Sila si Senador Panfilo “Ping” Lacson ug si Quezon City Rep. Precious Hipolito nipasaka og managsamang balaudnon sa Senado ug sa House of Representatives nga gitawag og Presidential Succession Act o designated survivor bill.
Ang ilang balaudnon magtugot sa pangulo sa pagpili ug pagtudlo sa usa ka senior Cabinet member nga molingkod isip acting president kon ang presidente ug ang iyang mga constitutional successors sama sa bise presidente, Senate president ug House speaker mangamatay.
Sa salidang “Designated Survivor,” si Kiefer Sutherland nga nagdala sa papel ni Urban Development Secretary Tom Kirkham, gitagoan atol sa State of the Union. Nahimo siyang presidente sa dihang gibombahan ang US Capitol ug nangamatay ang presidente ug ang tanang mga tawo nga nitambong sa State of the Union.
Mao kini ang inspirasyon ni Lacson. Bitaw. Simbako mahitabo kini atol sa State of the Nation Address nga tambongan sa bise presidente, mga sakop sa Senado ug House of Representatives, mga mahistrado sa Korte Suprema ug mga sakop sa Cabinet. Kadtong absent, morag may planong magpresidente. (edbarrita@gmail.com)